Gündə səkkiz fincandan çox isti çay və ya qəhvənin müntəzəm istifadəsi mədə xərçəngi riskini əhəmiyyətli dərəcədə artırır.
Xeberle.com məlumat verir ki, bu nəticəyə Çinin Pekin Tibb Universitetinin alimləri gəlib.
Araşdırma UK Biobank layihəsinin məlumatları əsasında aparılıb. Tədqiqatda sağlamlıq vəziyyəti təxminən 12 il ərzində izlənilən 328 mindən çox insan iştirak edib. Alimlər yalnız içilən içkilərin həcmini deyil, həm də onların temperaturunu ilıqdan çox istiyə qədər nəzərə alıblar.
Analiz göstərib ki, gündəlik səkkiz fincandan çox isti içki qəbul edən şəxslərdə mədə xərçəngi riski, daha az içənlər və ya aşağı temperaturda içki seçənlərlə müqayisədə 54 faiz daha yüksəkdir. Xüsusilə çox isti içkiləri müntəzəm qəbul edənlər arasında fərq daha kəskin olub - eyni miqdarda içki qəbul edildiyi halda bu qrupda risk iki dəfədən çox artıb.
Bu əlaqə yaş, həyat tərzi, siqaret çəkmə və digər risk faktorları nəzərə alındıqdan sonra da qüvvədə qalıb. Tədqiqat müəllifləri hesab edirlər ki, əsas rol mədə selikli qişasının xroniki termiki qıcıqlanmasıdır. Bu isə iltihabı və toxuma zədələnməsini gücləndirərək bədxassəli dəyişikliklər üçün şərait yaradır.
Xəbərdən istifadə edərkən istinad etmək vacibdir.
