Sumqayıt şəhərində 4-cü mikrorayonda yaşayan Gülzar Şamilova ilə qardaşı oğlu Şünasi Şamilov arasında mülkiyyət mübahisəsi yaranıb. Tərəflər iddialarının doğru olduğunu bildirir və məsələ artıq məhkəmə instansiyalarından da keçib.
Gülzar Şamilovanın iddiaları
Gülzar Şamilovanın Real TV-yə açıqlamasına görə, mübahisə valideynlərinə məxsus olmuş ev üzərində yaranıb. O bildirir ki, əvvəllər bacısı, qardaşı və özü həmin ünvanda qeydiyyatda olublar. Qohumlarının vəfatından sonra evdə fiziki məhdudiyyətli bacısına qulluq etdiyini deyir. O, rəsmi sənədlərdə adı olmasa da, qardaşı oğlunun onunla birgə evdə yaşadığını bildirib. Evi satıb pulunun bir hissəsini verməyi təklif etdiyini, lakin Şünasi Şamilovun bununla razılaşmadığını vurğulayıb. Gülzar Şamilovanın sözlərinə görə, hazırda qarşı tərəf onun əmlak hüquqlarını tanımır.
Şünasi Şamilov isə Xeberle.com-a açıqlamasında bibisinin iddialarını təkzib edib və daha fərqli mənzərə ortaya qoyub.
Onun dediklərinə görə, valideynləri 2020-ci ildə vəfat etdikdən qısa müddət sonra bibisi evin qıfılını dəyişərək onu mənzildən kənarda qoyub. Məhkəmə qərarı ilə yenidən evə köçürüldüyünü bildirir. Sonradan bibisinin evi xəbərsiz şəkildə öz adına özəlləşdirdiyini, buna görə məhkəməyə müraciət etdiyini deyir. Şünasi Şamilovun iddiasına görə, həm şəhər məhkəməsi, həm də apellyasiya instansiyası onun xeyrinə qərar verib və özəlləşdirmə sənədinin etibarsız olduğunu müəyyən edib.
O əlavə edib ki, sözügedən ev əvvəlcə orderlə nənəsinin adına olub və həmin orderdə Şünasi Şamilovun atası, anası və bibisinin adları qeyd edilib.
Şamilov bibisi tərəfindən ona və ailə üzvlərinə qarşı müxtəlif təzyiqlər göstərildiyini də iddia edib. Onun sözlərinə görə, təhlükəsizlik məqsədilə evdə müşahidə kameraları quraşdırıb və müəyyən görüntülər əldə edib. Bu iddialar hazırda yalnız onun tərəfi tərəfindən səsləndirilir.
Xəbərdən istifadə edərkən istinad etmək vacibdir.
