Sumqayıt şəhərində Xəzər dənizinin suyunun duzsuzlaşdırılması zavodunun tikintisi ölkənin su təhlükəsizliyinin gücləndirilməsi istiqamətində atılan strateji və mühüm addımlardan biridir. Sürətlə inkişaf edən sənaye şəhəri olan Sumqayıtın içməli suya olan artan tələbatının dayanıqlı şəkildə ödənilməsi bu layihənin əsas prioritetləri sırasında yer alır. Xəzər dənizi kimi zəngin su hövzəsinin imkanlarından müasir texnologiyalar vasitəsilə səmərəli istifadə olunması mövcud şirin su ehtiyatlarına düşən təzyiqi azaltmaqla yanaşı, onların qorunmasına və bərpasına şərait yaradacaq.
Dəniz suyunun 10 metr dərinlikdən götürülməsi nəzərdə tutulur. Su əvvəlcə filtrlənəcək, daha sonra membranlardan keçirilərək duzsuzlaşdırılacaq. Nəticədə gündəlik 300 min kubmetr içməli su istehsal olunacaq. Xəzər dənizinin suyunun duzluluq səviyyəsinin aşağı olması enerji sərfiyyatını əhəmiyyətli dərəcədə azaldacaq.
Məlum olduğu kimi, Xəzər dənizində su səviyyəsinin azalması müşahidə olunur. Lakin layihə çərçivəsində dənizdən götürüləcək suyun həcmi az olacaq və 10 metr dərinlikdən çəkildiyi üçün bu proses dənizin daha da geri çəkilməsinə səbəb olmayacaq. Dənizdən alınan suyun təxminən 70 faizi içməli suya çevriləcək.
Ümumilikdə, dəniz suyunun duzsuzlaşdırılması enerji tutumlu proses olsa da, Xəzər dənizinin aşağı duzluluq səviyyəsi və temperatur göstəriciləri bu prosesdə enerji sərfiyyatını təxminən iki dəfə azaltmağa imkan verəcək.
Dənizdən borular vasitəsilə gətirilən su duzsuzlaşdırıldıqdan və minerallaşdırıldıqdan sonra içməli suyun bir hissəsi Ceyranbatan su anbarına, digər hissəsi isə Sumqayıt şəhər əhalisinin içməli suya olan tələbatının ödənilməsinə yönəldiləcək.
Zavod İqtisadi Zonaların İnkişaf Agentliyinə məxsus ərazidə yerləşəcək. Ümumi sahə 27 hektar, zavodun bilavasitə tutduğu ərazi isə 8 hektar təşkil edir. Tikinti zamanı zavodun səviyyəsi su səthindən 7 metr hündürlükdə planlaşdırılıb ki, bu da gələcəkdə suyun səviyyəsinin qalxması ehtimalına qarşı qabaqlayıcı tədbir kimi nəzərdə tutulub. Mümkün risklər tam şəkildə qiymətləndirilib və planlama buna uyğun aparılıb.
Sumqayıtda tikiləcək duzsuzlaşdırma zavodunun inşasını ACWA Power şirkəti həyata keçirəcək. Xəzər dənizinin suyunun duzsuzlaşdırılması layihəsi artıq təsdiqlənib və yaxın vaxtlarda tikinti mərhələsinə başlanılması planlaşdırılır. Layihənin 2028-ci ilin sonunadək tamamlanması nəzərdə tutulur.
(AZTV)
Xəbərdən istifadə edərkən istinad etmək vacibdir.
