Prezident İlham Əliyevin Slovakiyaya səfəri və bu səfər çərçivəsində səslənən mesajlar Azərbaycan–Slovakiya münasibətlərinin mahiyyət etibarilə dostluq və strateji tərəfdaşlıq üzərində qurulduğunu bir daha təsdiqlədi. Son illər bu əlaqələr təkcə siyasi dialoqla məhdudlaşmır, iqtisadiyyat, energetika, sənaye, nəqliyyat və yüksək texnologiyalar kimi sahələri əhatə edən sistemli əməkdaşlıq modelinə çevrilir.
Ötən il imzalanmış Strateji Tərəfdaşlıq haqqında Birgə Bəyannamə münasibətlərin inkişafında mühüm mərhələ oldu. Bu sənəd iki ölkə arasında qarşılıqlı etimadın və uzunmüddətli əməkdaşlıq niyyətinin hüquqi və siyasi əsasını formalaşdırdı. Məhz bu mərhələdən sonra birgə mexanizmlərin, o cümlədən iqtisadi işçi qrupların daha fəal işləməsi müşahidə olunur.
Energetika sahəsi Azərbaycan–Slovakiya əməkdaşlığının aparıcı istiqamətlərindən biridir. Azərbaycanın zəngin qaz ehtiyatları və inkişaf etmiş ixrac infrastrukturu Avropa enerji bazarında ölkəmizin rolunu gücləndirib. Slovakiyaya Azərbaycan qazının çatdırılması təkcə ikitərəfli münasibətlər baxımından deyil, bütövlükdə Avropanın enerji təhlükəsizliyi kontekstində də mühüm əhəmiyyət daşıyır. Mövcud resurslar və yeni yataqların istismarı bu əməkdaşlığın davamlı olacağını göstərir.
Müdafiə sənayesi sahəsində perspektivlər isə fərqli bir yanaşmanı önə çıxarır. Burada əsas məqsəd silahlanma yarışı deyil, sənaye və texnoloji inkişafdır. Slovakiyanın texnoloji bilikləri ilə Azərbaycanın maliyyə imkanlarının uzlaşdırılması innovativ məhsulların istehsalına və sənayenin modernləşməsinə yol aça bilər. Bu cür əməkdaşlıq həm də elmi-texniki potensialın artırılmasına xidmət edir.
Azərbaycanın nəqliyyat və logistika sahəsində artan rolu Slovakiya üçün də yeni imkanlar yaradır. Ölkəmizin Şərqlə Qərb arasında mühüm tranzit mərkəzinə çevrilməsi, Orta Dəhlizdə fəal iştirakı regionlararası ticarətin inkişafına güclü təkan verir. Mərkəzi Asiyanı Avropa ilə birləşdirən ən etibarlı marşrutlardan birinin Azərbaycandan keçməsi bu əməkdaşlığı strateji səviyyəyə qaldırır.
Eyni zamanda, informasiya texnologiyaları və rəqəmsal infrastruktur sahəsində əməkdaşlıq gələcəyə yönəlik baxışın tərkib hissəsidir. Azərbaycanın böyük enerji potensialı, o cümlədən yaxın illərdə istifadəyə veriləcək əlavə güclər süni intellekt və data mərkəzlərinin yaradılması üçün əlverişli mühit formalaşdırır. Bu istiqamətdə Slovakiya şirkətləri ilə mümkün əməkdaşlıq hər iki tərəf üçün yeni iqtisadi və texnoloji perspektivlər açır.
Bütün bu amillər onu göstərir ki, Azərbaycan–Slovakiya münasibətləri sadəcə iki ölkə arasında əməkdaşlıq deyil, daha geniş regional və beynəlxalq maraqları əhatə edən strateji tərəfdaşlıq modelidir. Qarşılıqlı hörmətə, müstəqil siyasətə və real iqtisadi maraqlara əsaslanan bu xətt gələcək illərdə əlaqələrin daha da dərinləşəcəyini deməyə əsas verir.
Sumqayıt Tibb Mərkəzinin Uşaq Xəstəxanasının həkim-infeksionisti,
Əməkdar həkim Sehri Babayev
Xəbərdən istifadə edərkən istinad etmək vacibdir.
