Bakı–Sumqayıt avtomobil yolunun bir hissəsində yol boyu quraşdırılmış işıq dirəklərinin işləməməsi sürücülər və piyadalar üçün ciddi təhlükə yaradır.
Məsələyə bağlı Xeberle.com-a müraciət edən sürücülər bildirir ki, axşam və gecə saatlarında yolun tamamilə qaranlığa bürünməsi görünüş məsafəsini minimuma endirir, bu isə qəza riskini xeyli artırır.
Sürücülərin bildirdiyinə görə, xüsusilə intensiv hərəkətin olduğu saatlarda işıqlandırmanın olmaması avtomobillərin bir-birini gec görməsinə, qəfil manevrlərə və təhlükəli vəziyyətlərin yaranmasına səbəb olur. Nəticədə bu magistral yolda hərəkət edən minlərlə vətəndaş hər gün həyatını riskə atmalı olur.
Məsələ təkcə rahatlıqla bağlı deyil, birbaşa insan həyatı ilə əlaqəlidir. Yol infrastrukturu ilə bağlı məsul qurumların bu problemi vaxtında aradan qaldırmaması haqlı narazılıq doğurur. Vətəndaşlar işıq dirəklərinin nə üçün sönülü qalmasının və nə zaman bərpa olunacağının cavabsız qalmasından şikayətlənirlər.
Bakı–Sumqayıt yolu ölkənin ən işlək magistrallarından biridir. Belə bir strateji yolda elementar təhlükəsizlik tədbirlərinin görülməməsi ciddi suallar yaradır. Aidiyyəti qurumlar bu məsuliyyətsizliyə nə vaxta qədər göz yumacaq?
Xeberle.com
Xəbərdən istifadə edərkən istinad etmək vacibdir.
