GEROFARM şirkəti Azərbaycanda Tip 2 şəkərli diabetin müalicəsi və artıq çəki terapiyası üçün tətbiq edilən, təsiredici maddəsi semaqlutid olan Semavik preparatını qeydiyyatdan keçirib. Preparatın qeydiyyatı R-Pharm zavodu ("R-Pharm" Şirkətlər Qrupuna daxildir) ilə strateji əməkdaşlığın davamıdır. Preparat ölkədə Danimarkanın Ozempic preparatının ilk analoqu olub və artıq aptek şəbəkələrində mövcuddur.
Semavik — Tip 2 şəkərli diabetin müalicəsində vahid kardiometabolik yanaşmanı təmin edən kompleks təsirli preparatdır. Əvvəllər Azərbaycan bazarında semaqlutid tərkibli yalnız Novo Nordisk şirkətinin şpris-qələmləri təqdim edilirdi. Preparat Avropa istehsalı olan inyeksiya formasında (şpris-qələm) buraxılır ki, bu da 0,25 mq, 0,5 mq və 1 mq dozaların daxil edilməsinə imkan yaradaraq istifadəni pasiyent üçün rahat edir. Semavikin bir qablaşdırmasının qeydiyyata alınmış qiyməti 153,86 manat təşkil edib ki, bu da ölkə bazarındakı orijinal preparatın dəyərindən 32% aşağıdır.
Azərbaycan Səhiyyə Nazirliyinin statistikasına əsasən, 2024-cü ildə təxminən 715 300 nəfər şəkərli diabetdən əziyyət çəkib. Bununla yanaşı, piylənməsi olan pasiyentlərin sayı demək olar ki, 2 dəfə yüksəkdir və 1 530 900 nəfər və ya ölkə əhalisinin 15%-ni təşkil edir. Bu göstəricilər ölkədə artan piylənmə problemi ilə bağlıdır. Tip 2 şəkərli diabeti olan pasiyentlərin 80–90%-nin bu problemlə qarşılaşdığını və piylənmənin insulin müqavimətinin inkişafı səbəbindən əsas təhrikedici faktor olduğunu nəzərə alsaq, artıq çəki ilə mübarizə terapiyanın əsas məqsədinə çevrilir. Məhz buna görə də müasir müalicədə bu patoloji əlaqənin hər iki komponentinə eyni anda təsir göstərə bilən Semavik kimi innovativ preparatlar getdikcə daha çox tətbiq olunur.
Preparatın qeydiyyatı R-Pharm zavodu ilə strateji əməkdaşlıqda yeni bir addım oldu. Əvvəllər bu tərəfdaşlıq çərçivəsində R-Pharm-ın Bakıdakı zavodunun istehsal güclərində RinGlar®, RinFast® və RinFast® Mix 30 insulinlərinin ilk partiyası lokallaşdırılmış və istehsal edilmişdir.
«Semavikin Azərbaycan bazarına çıxarılması Azərbaycanın əczaçılıq sahəsinin inkişafına əhəmiyyətli təsir göstərəcək. Keyfiyyət və effektivlik baxımından dünya şirkətlərinin məhsulları ilə müqayisə oluna bilən preparat, əhali üçün innovativ dərmanların əlçatanlığının artırılmasına mühüm töhfə verəcək və beynəlxalq əməkdaşlığın inkişafına kömək edəcək», – deyə GEROFARM-ın baş direktoru Pyotr Rodionov qeyd edib.
«Şəkərli diabetin müalicəsi zamanı preparatların geniş seçimi həkimlərə hər bir pasiyent üçün terapiyanı daha asan seçmək imkanı verir. Effektiv preparatlara daha əlçatan qiymətlə çıxış imkanı, maliyyə imkanlarından asılı olmayaraq daha çox sayda pasiyentə kömək etmək imkanlarını genişləndirir və ehtiyacı olan hər kəs üçün keyfiyyətli müalicəyə çıxışı təmin edir», – Babək Saleh, aparıcı endokrinoloq, Azərbaycan Endokrinoloqlar Elmi Cəmiyyətinin sədr müavini.
GEROFARM – dünyanın 14 ölkəsində fəaliyyət göstərən beynəlxalq biotexnoloji preparatlar istehsalçısıdır. Bu gün şirkət Rusiyada piylənmənin müalicəsi üçün preparatlar bazarında 1-ci yeri tutur və dünyada TOP-10 insulin istehsalçıları sırasına daxildir. Tibb ictimaiyyətinin və pasiyentlərin yüksək etimadı sayəsində Semavik preparatı bu gün Rusiyada semaqlutid tərkibli ən populyar preparatdır və Rusiya Federasiyasının aptek şəbəkələrində satış həcminə görə lider mövqe tutur.
R-Pharm əczaçılıq zavodu 2019-cu ildən Pirallahı Sənaye Parkında fəaliyyət göstərir. İstehsalat kompleksi MDB ərazisində ən müasir müəssisələrdən biridir və özündə istehsalat, laboratoriya və logistika bloklarını birləşdirir. Müəssisənin sahəsi 4,6 hektar təşkil edir, istehsal gücü isə ildə 250 milyon ədəd məhsulu ötür.
Semavik/Semaviс dərman preparatı. Beynəlxalq patentləşdirilməmiş adı: semaqlutid. Qeydiyyat vəsiqəsi DV №25-00953, 21.07.2025-ci il tarixində Azərbaycan Respublikası Səhiyyə Nazirliyi tərəfindən verilib. Əks göstərişlər: preparatın maddələrinə qarşı yüksək həssaslıq; 18 yaşadək uşaq yaşı; hamiləlik və südvermə dövrü. İstifadədən əvvəl tam təlimatla tanış olmaq və həkimlə məsləhətləşmək zəruridir.
Xəbərdən istifadə edərkən istinad etmək vacibdir.
