Dünyanın bir çox məşhur şəhərləri var ki, onların simvoluna çevrilmiş təkcə meydanları, abidələri və ya küçələri deyil, həm də pilləkənləridir. Roma şəhərindəki İspan pilləkənləri, İstanbulun tarixi keçid və enişləri, Odessanın Potyomkin pilləkənləri, Kiyevin Andreyvskiy enişi, Rio-de-Janeyroda memarlıqla sənətin sintezini yaradan pilləkən kompozisiyaları, Vatikanın monumental enişləri — bütün bunlar sadəcə keçid vasitəsi deyil, tarixi dəyəri, memarlıq zövqü və bədii ifadəni birləşdirən şəhər vizit kartlarıdır. Bu pilləkənlər turistləri cəlb edir, şəhərin yaddaşında qalır və zamanla mədəni simvola çevrilir.
Bu gün Sumqayıt artıq Bulvarı, yaşıl parkları ilə tanınan və seçilən bir şəhərə çevrilib. Son illərdə şəhərimizdə aparılan yenidənqurma işləri Sumqayıtı təkcə sənaye şəhəri kimi deyil, eyni zamanda rahat məskunlaşma mühiti kimi təqdim edir. Xüsusən regionlardan ciddi miqrasiya axınları hiss olunur. Bulvar, dənizkənarı park, yaşıllıq zolaqları və istirahət məkanları şəhərin simasını dəyişib və ona yeni nəfəs verib.
Məhz bu inkişafın davamı olaraq Sumqayıt Bulvarında unikal bir "Pilləkən kompleksi”nin yaradılması olduqca maraqlı və perspektivli ideya ola bilər. Bunun üçün həm vizual, həm funksional baxımdan uyğun yer də mövcuddur. Dənizkənarı parkın "Göyərçin” abidəsi tərəfdən Şəhidlər Xiyabanına doğru uzanan hissəsində, orta məsafədə Bulvara enən bir pilləkən kompleksi şəhər məkanına həm estetik dəyər, həm də rəmzi məna qata bilər.
Bu cür memarlıq nümunəsi təkcə keçid rolunu oynamaz, eyni zamanda şəhərin yeni simvollarından birinə çevrilə bilər. Pilləkənlər üzərində lokal və milli ornamentlər, işıqlandırma elementləri, yaşıllıq və istirahət guşələri yaradılmaqla Sumqayıta xas, yaddaqalan bir arxitektura əsəri ortaya çıxarmaq mümkündür.
Azərbaycanda, o cümlədən Sumqayıtda təcrübəli və tanınmış memarlar, dizaynerlər və şəhərsalma mütəxəssisləri mövcuddur. Onların yaradıcı yanaşması və peşəkar baxışı ilə yüksək sənətkarlıq keyfiyyətləri ilə seçilən, həm müasir, həm də milli ruhu əks etdirən bir "Pilləkən kompleksi”nin ərsəyə gəlməsi tam realdır.
Belə bir layihə Sumqayıtın urban mədəniyyətinə yeni qatqı verər, şəhərin turizm potensialını artırar və gələcək nəsillər üçün estetik yaddaş obyekti kimi qalardı. Şəhərlər yalnız binalarla deyil, ideyalarla gözəlləşir. Sumqayıt üçün belə bir memarlıq ideyası isə məhz bu gözəlliyin davamı ola bilər.
Cabir Sultanov
Xeberle.com
Xəbərdən istifadə edərkən istinad etmək vacibdir.
