Azərbaycan xalqı bu gün Ulu Öndər Heydər Əliyevin anadan olmasının 102-ci ildönümünü böyük ehtiramla qeyd edir. Müasir Azərbaycan dövlətinin memarı olan bu böyük şəxsiyyətin irsi bu gün də bütün sahələrdə, o cümlədən səhiyyə sistemində yaşayır və inkişaf edir. Onun əsas prinsiplərindən biri insan amilinin ön planda tutulması, xalqın rifahı və sağlamlığına xidmət edən sistemlərin qurulması olmuşdur.
Heydər Əliyevin hakimiyyətdə olduğu bütün dövrlərdə səhiyyə sahəsinə, xüsusilə də bu sahənin fədakar üzvləri olan tibb bacılarına göstərdiyi xüsusi diqqət və qayğı bu gün də böyük hörmət və minnətdarlıqla xatırlanır. Ulu Öndər tibb bacılarını səhiyyə sisteminin ən mühüm dayaqlarından biri kimi qiymətləndirirdi. Onun sözləri ilə desək:
"Tibb bacısının peşəsi həm savad, həm də ürək tələb edir. O, yalnız peşəkar deyil, həm də mərhəmətli olmalıdır.”
Bu yanaşma təkcə bir fikir deyil, eyni zamanda ölkəmizdə tibb bacılarının sosial statusunun yüksəldilməsi, peşəkar bacarıqlarının inkişaf etdirilməsi və onların əmək şəraitinin yaxşılaşdırılması üçün konkret addımlarla müşayiət olunurdu. Ulu Öndərin təşəbbüsü ilə Azərbaycanın müxtəlif bölgələrində tibb bacılarının hazırlığı üçün ixtisaslaşdırılmış kurslar açılmış, tibbi təhsil müəssisələrinin maddi-texniki bazası gücləndirilmiş və bu sahəyə yüksək ixtisaslı kadrların cəlb olunması təmin edilmişdir.
Tibb bacıları həm xəstənin sağlamlığına dəstək, həm də mənəvi dayaqdır. Onların varlığı xəstənin yanında sakitləşdirici bir nəfəs, şəfqətli bir baxış, ümid verən bir əldir. Ulu Öndər bu xüsusiyyəti çox dəqiq dərk edir və dəfələrlə çıxışlarında tibb bacılarının fədakar əməyini yüksək qiymətləndirirdi. Onun təşəbbüsü ilə bu peşənin nüfuzunun artırılması istiqamətində geniş tədbirlər həyata keçirilmişdir.
Bu gün ölkəmizdə minlərlə tibb bacısı öz işinə peşəkarcasına yanaşaraq, xalqın sağlamlığı naminə fədakarlıqla çalışır. Onlar Ulu Öndərin müəyyən etdiyi ali prinsipləri öz iş fəaliyyətlərində yaşadır, səhiyyə sahəsinin inkişafına töhfə verirlər.
Heydər Əliyevin bu sahəyə verdiyi böyük dəyər bu gün də öz aktuallığını qoruyur və Azərbaycan Respublikasının Prezidenti cənab İlham Əliyev, eləcə də Birinci vitse-prezident Mehriban xanım Əliyeva tərəfindən uğurla davam etdirilir. Müasir dövrdə səhiyyənin inkişafı, tibbi kadrların hazırlanması və səhiyyə işçilərinin sosial müdafiəsinin gücləndirilməsi istiqamətində atılan hər bir addım Ulu Öndərin müəyyən etdiyi strateji xəttin davamıdır.
Heydər Əliyevin 102-ci ildönümündə bu böyük şəxsiyyətin tibb bacılarına verdiyi dəyəri xatırlamaq, onun irsini yaşatmaq hər bir səhiyyə müəssisəsinin, hər bir tibb işçisinin mənəvi borcudur. Ulu Öndərin ideyaları bu gün də sağlamlıq keşiyində dayanan hər bir tibb bacısının ürəyində yaşayır və onlara ruh verir.
Qızılgül Bünyatova
Sumqayıt Tibb Mərkəzinin
Tibb bacıları şöbəsinin rəhbəri
Xəbərdən istifadə edərkən istinad etmək vacibdir.
