Xeberle.com xəbər verir ki, moderator.az-ın məlumatına görə, oxucularına təqdim etdiyi aşağıdakı fotolar və video hansısa xarabalığı, gözdən - könüldən iraq bir yeri xatırlatsa da, əslində belə deyil. Bu kadrlar Sumqayıtdakı 9 mikrorayonun ərazisində yerləşən, şəhər sakinlərinin "Şərq" bazarı kimi tanıdıqları bir yerdə yaddaşa köçürülüb. 
Şəhərin abadlaşmasından, gündən - günə gözəlləşməsindən dəm vuran başbilənlər bu biabırçı mənzərəni heç görüblərmi? Görüblərsə nəyə görə şəhərin mərkəzində qərar tutan, dəmir - dümür, zir - zibil yığnağına çevrilən bu acınacaqlı mənzərəyə göz yumublar? 
Hazırda "RSHT" Şirkətinin Ticarət Mərkəzi adlanan əraziyə Rəşid Babayev cavabdehdir. Bu şəxs Ticarət Mərkəzinin rəhbəridir. Ola bilsin ki, Rəşid müəllimin başı gündəlik "qayğılarına", icarə haqlarının yığılmasına qarışıb. Bəs əsas cavabdeh qurumlar hara baxır?
İnanırıq ki, şəhərin estetik görünüşünə xələl gətirən bu ölüxana tezliklə "dirildiləcək".