Yol genişləndirilir, köhnə asfalt sökülür

Xəbər verdiyimiz kimi, Sumqayıt şəhəri ilə Abşeron rayonunu birləşdirən Saray körpüsündən Sumqayıt istiqamətində - General Məhəmməd Əsədov küçəsində təxminən 500 metr məsafədə yolun müasir standartlara uyğun iki istiqamətdə dörd zolaq üzrə genişləndirilməsi işlərinə başlanılıb. Məlum məsələdir ki, yeni infrastruktur layihəsinin icrasında məqsəd nəqliyyatın hərəkətini asanlaşdırmaq və əhalinin rahatlığını təmin etməkdir. Hazırda körpü ətrafında yolun genişləndirilməsi və infrastrukturun körpüyə uyğunlaşdırılması istiqamətində fəal iş gedir. Əraziyə müxtəlif təyinatlı ağır texnikalar cəlb olunub. Yolun bəzi hissələrində köhnə asfalt örtüyü sökülüb, qazıntı işləri aparılır. Bu işlər çərçivəsində yol kənarlarında istinad divarlarının möhkəmləndirilməsi, yağış sularının axıdılması üçün drenaj sistemlərinin qurulması da həyata keçiriləcək.
Tikinti işlərinin mərhələli şəkildə həyata keçirilməsi nəzərdə tutulub. Layihənin icrası nəticəsində həmin istiqamətdə nəqliyyatın hərəkət sıxlığı azalacaq, eyni zamanda vətəndaşların gündəlik gediş-gəlişi daha təhlükəsiz və rahat olacaq. Ən əsası proses zamanı körpü tikintisində olduğu kimi hərəkət tam məhdudlaşdırılmayıb, və nəqliyyatın hərəkəti təmin edilir.
Xeberle.com-un əməkdaşı sözügedən əraziyə baş çəkərək tikinti işləri ilə tanış olub. Əməkdaşımızla fikirlərini bölüşən sakinlər və sürücülər bildirib ki, yolun genişləndirilməsi çox müsbət addımdır.


Saray körpüsü ətrafındakı sıxlıq müvəqqətidir


Qeyd edək ki, cari ilin mart ayından yüksək səviyyədə inşa olunan Saray körpüsünə giriş və çıxış yollarında avtomobil sıxlığı müşahidə olunur. Xüsusilə səhər və axşam pik saatlarda bu əraziyə daxil olan sürücülər tıxac səbəbilə çətinliklə üzləşirlər. Lakin bu müvəqqəti xarakter daşıyır. Yolun genişləndirilməsi və infrastrukturun yenilənməsi işləri tamamlandıqdan sonra ərazidə nəqliyyatın hərəkəti xeyli rahatlaşacaq. Bu isə həm sürücülərin, həm ictimai nəqliyyatdan istifadə edən sərnişinlərin işini asanlaşdıracaq, həm də küçə boyunca fəaliyyət göstərən dükanlardan alış-veriş imkanlarını artıracaq. Nəticədə Sumqayıtın 2-ci giriş-çıxışı sayılan bu ərazidə sahibkarlığın inkişafına da müəyyən təkan veriləcək.


Yol inkişafına kölgə salmaq cəhdləri nəticəsiz qalır


Amma təəssüflər olsun ki, atılan hər müsbət addımda yalnış axtarmağa çalışan, görülən işlərə mənfi kölgə salmaq istəyənlər də az deyil. Ötən ay şaiyələr dolaşmağa başladı ki, guya yeni inşa olunan Saray körpüsündə çökmə var. Az sonra məlum oldu ki, əslində körpüdə hər hansı problem yoxdur, yalnız yanaşma yollarda çat və çuxurlar yaranıb. Sadəcə körpü yeni təmir olunduğundan həmin yollarda hər hansı bərpa işləri aparılmamışdı, çünki həmin ərəfədə yolun körpünün eninə uyğun 4 hərəkət zolağı qorunmaqla yenidən qurulması layihəsi hazırlanırdı. Və budur, layihə artıq həyata keçirilir.
Xüsusilə qeyd etməliyik ki, Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov quruma rəhbərlik etdiyi dövrdən bu günə kimi ölkənin sosial-iqtisadi inkişafını şərtləndirən mühüm amillərdən sayılan avtomobil yolları təsərrüfatında köklü dəyişikliklər baş verib. Yol infrastrukturu üzrə mühüm layihələr həyata keçirilib, yeni yollar, körpülər salınıb. Bir sözlə, Azərbaycanda yol infrastrukturunun inkişafı dövlətin əsas prioritetlərindən birinə çevrilib.
Hazırda ölkəmizdə yeni yolların salınması, mövcud yolların əsaslı şəkildə yenidən qurulması ilə bağlı layihələr durmadan uğurla davam etdirilir. Təbii ki, görülən işlərin əsas məqsədi nəqliyyat sistemində sıxlıq və tıxacların aradan qaldırılması, vətəndaşların avtomobil yollarını rahat və təhlükəsiz şəkildə keçməsinin təmin edilməsi baxımından xüsusi əhəmiyyətə malikdir.


Elşən YƏHYAYEV, 
Xeberle.com