Sumqayıt şəhərinin Səməd Vurğun küçəsində, məcburi köçkünlərin məskunlaşdığı keçmiş "Metallurq" sanatoriyasının binasında acınacaqlı vəziyyət hökm sürür. Sakinlərin sözlərinə görə, bina tamamilə qəzalı vəziyyətdədir.
Sakinlər Xeberle.com-a müraciət edərək bildiriblər ki, zirzəmini uzun müddətdir su basıb. Bu, həm pis qoxuya, həm də ağcaqanadların artmasına səbəb olub və nəticədə orada yaşamaq olduqca çətinləşib. Elektrik sistemləri də demək olar ki, sıradan çıxıb — şit tez-tez partlayır, sakinlər saatlarla işıqsız qalır. Bundan başqa, su problemi də olduqca ciddidir.
Sakinlər aidiyyəti qurumlardan xahiş edirlər ki, bu problemlərə dərhal reaksiya verilsin və tədbir görülsün. Onlar illərdir bu şəraitdə yaşamağın artıq dözülməz olduğunu bildirirlər.
Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən Xeberle.com-a bildirilib ki, Sumqayıt şəhəri, Səməd Vurğun küçəsi, 26-cı məhəllə, "Metallurq" sanatoriyası adlanan ərazidəki vəziyyət barədə qurum məlumatlıdır. Qeyd olunub ki, məcburi köçkünlərin yaşadığı binadakı mövcud vəziyyət Komitə tərəfindən diqqətlə izlənilir və nəzarətdə saxlanılır. Yaranmış vəziyyətlə bağlı artıq aidiyyəti dövlət qurumları ilə əlaqə saxlanılıb və problemin həlli istiqamətində danışıqlara başlanılıb. Hazırda məsələ ilə bağlı zəruri araşdırmalar aparılır.
Xatırladaq ki, sözügedən ərazidə Sovetlər birliyi dönəmində məşhur "Metallurq" sanatoriyası fəaliyyət göstərib. Yerin 250-300 metr dərinliyindən tərkibinə görə SSRİ ərazisində 2-ci olan müalicəvi yodlu-bromlu su çıxırdı. 1962-ci ildən Azərbaycanın müstəqillik dövrünün ilk illərinə qədər fəaliyyət göstərən sanatoriyada minlərlə xəstə şəfa tapmışdır. Fəaliyyət göstərdiyi dövrdə sanatoriyada tibb prosedurları arasında yodlu-bromlu su vannaları, naftalan vannası, sualtı və sirkulyar duşlar, idman terapiyası kimi geniş çeşidli müalicə üsulları tətbiq olunurdu. Potensial turizm resursu kimi qiymətləndirilən bu yer dövlət dəstəyi ilə yenidən - müasir standartlara uyğun qurularaq istifadə edilə bilər.
Xəbərdən istifadə edərkən istinad etmək vacibdir.
