Hədəf STEAM Liseyi görkəmli Azərbaycan memarı Əcəmi Naxçıvaninin 900 illik yubileyinə həsr olunmuş "Zamanı Aşan Memarlıq” adlı genişmiqyaslı tədbir keçirib.
Tədbirin məqsədi memarlıq irsimizin qorunması, Əcəmi Naxçıvaninin yaradıcılığının gənc nəslə tanıdılması və şagirdlərdə tarixə, mədəniyyətə marağın artırılması olub.
Proqram çərçivəsində təşkil olunan üçmərhələli intellektual yarışma — "Oxuduqlarım, bildiklərim, gördüklərim”, "Məşhur tikililər” və "Tikdim ki izim qala” bölmələrindən ibarət olub. Şagirdlər bu mərhələlərdə Əcəmi Naxçıvaninin həyatı və yaradıcılığı, onun memarlıq üslubu və dövrün memarlıq nümunələri barədə biliklərini nümayiş etdiriblər.
Yarışmanın sonunda fərqlənən iştirakçılar sertifikatlarla təltif olunublar.
Tədbirin növbəti hissəsində şagirdlərin hazırladığı sərgi təqdim edilib. Sərgidə Əcəmi memarlığından ilhamlanan maketlər, rəsmlər, əl işləri və yaradıcı layihələr nümayiş olunub. Ardınca liseyin şagirdlərinin hazırladığı rəqs kompozisiyası tədbirə xüsusi rəng qatıb.
Sonda şagirdlər Memar Əcəmi Naxçıvaninin yaratdığı tarixi tikililər əsasında öz yaradıcılıq bacarıqlarını sərgiləyərək qonaqlara maraqlı təqdimatlar ediblər.
