"Son iki ildə müşahidələr göstərir ki, əmlakların satışında azalmalar var. Bunun səbəbləri bəllidir. Mənzil bazarında qiymətlər bahalaşdıqca, əlçatanlıq azalır. Bu da təbii ki, mənzil alıcılarının sayının azalmasına gətirib çıxarır".
Bunu Xeberle.com-a açıqlamasında əmlak məsələləri üzrə ekspert Ramil Osmanlı deyib. O bildirib ki, 2023-cü ildə Rusiyadan, Ukraynadan və digər qonşu ölkələrdən daxilolmalar hesabına rəqəmələr pik həddə çatmışdı:
"Amma son iki ildə azalmalar müşahidə edirik. Qarşıdakı ildə prosesin necə cərəyan edəcəyini, azalma və ya artım olacağını indidən demək bir qədər çətindir. Bütövlükdə bütün amillərə baxmayaraq, daşınmaz əmlak bazarında qiymət artımları davam edir. Doğrudur, 2025-ci ilin qiymət artımları əvvəlki illərlə müqayisədə daha stabildir. Hər bir halda qiymət artımı var və davam edir".
Növbəti ildə daşınmaz əmlak bazarında qiymətlərin necə dəyişəcəyinə gəlincə, ekspert qeyd edib ki, qiymət azalması gözlənilmir. Onun sözlərinə görə, dövlət büdcəsində tikinti və infrastruktur xərcləri üçün ayrılan vəsaitlərin həcmində nisbi artım var:
"Bu onu deməyə əsas verir ki, şəhərsalma prosesi dayanmayıb, davam edir. Neft qiymətində azalmalar olsa belə hökumət iqtisadiyyatın qeyri-neft sektorunda əsas paya sahib olan daşınmaz əmlak bazarının zəifləməsində maraqlı deyil. Bu prosesdə investisiya axınının təmin olunması və bu istiqamətin daha da inkişaf etdirilməsi ilə bağlı tədbirlər üzərində işləyir. Amma nəzərə almaq lazımdır ki, gələn il üçün iqtisadi göstəricilərə dair indidən proqnoz vermək bir qədər çətindir. Bu il daşınmaz əmlak bazarı üzrə əməliyyatların həcmini nəzərə alsaq, alqı-satqıda azalmlar gözlənilir. Təəssüf ki, bizim bazar tam olaraq makroiqtisadi amillərdən, tələb-təklifdən asılı olmadığına görə, tələb düşsə də, qiymət artmaqda davam edir. Burada təbii ki, subyektiv amillər var".
R.Osmanlı əlavə edib ki, yeni tikililərdə qiymətlər köhnə tikililərlə müqayisədə daha çox artır: "Ondan irəli gəlir ki, bu istiqamətdə qiymət siyasətinə bazar nəzarət etmir. Qiymət siyasətinə diqtə edən tərəf mənzil tikinti kooperativlərinin, investorların özləridir. Onlar dövriyyə vəsaitləri hesabına fəaliyyət göstərmirlər. Gəlir olmasa, mənfəət az olsa, qiyməti azaltmaqda maraqlı deyillər. Burada inzibati təsirləri də qeyd etməliyik. Müşahidələr göstərir ki, müəyyən inzibati təsirlər hesabına bazarda qiymət artımına təsir göstərən səbəblər var. Bütün istiqamətlərdə daha çox ilkin mənzil bazarından yaranan qiymət artımını müşahidə edirik".

Xəbərdən istifadə edərkən istinad etmək vacibdir.