Sumqayıt şəhərinin 9-cu mikrorayon ərazisində yerləşən mədəni istirahət parkı — Lüdviqshafen parkı bu gün baxımsız vəziyyəti ilə ciddi narahatlıq doğurur. Park Sumqayıt şəhəri ilə Almaniyanın Lüdviqshafen şəhəri arasında qurulmuş qardaşlaşma münasibətlərinin rəmzi olaraq salınıb. Qeyd etmək lazımdır ki, Lüdviqshafen şəhərində də "Sumqayıt” adlı küçə mövcuddur. Bu fakt iki şəhər, eləcə də Azərbaycan–Almaniya dostluq münasibətlərinin qarşılıqlı hörmət və ehtiram üzərində qurulduğunu göstərir.
Şəhər sakinləri arasında "Alman parkı” kimi tanınan Lüdviqshafen parkı 1997-ci ildə Sumqayıt–Lüdviqshafen əlaqələrinin 20 illiyi münasibətilə istifadəyə verilib. Təəssüf ki, bu gün həmin parkın xüsusilə uşaqlar üçün nəzərdə tutulmuş əyləncə hissəsi baxımsızlıq və nəzarətsizlik ucbatından acınacaqlı vəziyyətə düşüb.
Xeberle.com-un məlumatına görə, uşaq attraksionlarının əksəriyyəti sıradan çıxıb, yelləncəklər sınıq, metal konstruksiyalar paslanmış, təhlükəsizlik normalarına cavab verməyən qurğular isə real risk mənbəyinə çevrilib. Parkın ərazisində təmizlik və sanitar vəziyyət də qənaətbəxş deyil. Bu isə parkdan istifadə edən uşaqların sağlamlığına və təhlükəsizliyinə ciddi təhdid yaradır.
Ən üzücü məqam odur ki, bu park təkcə istirahət məkanı deyil, eyni zamanda iki şəhər arasında qurulan beynəlxalq dostluğun simvoludur. Belə bir məkanın baxımsız vəziyyətə salınması təkcə yerli əhəmiyyət daşımır, eyni zamanda Azərbaycan–Almaniya dostluq münasibətlərinə qarşı laqeyd yanaşma təsiri bağışlayır. Xüsusilə nəzərə alsaq ki, Almaniyanın Lüdviqshafen şəhərində Sumqayıt parkı qorunur və saxlanılır, bu laqeydlik daha qabarıq şəkildə nəzərə çarpır.
Parkın vəziyyəti valideynlərin haqlı narazılığına səbəb olur. Gün ərzində onlarla uşağın ziyarət etdiyi məkanda nə mütəmadi texniki baxış aparıldığı, nə də əsaslı təmir işlərinin görüldüyü hiss olunur. Aidiyyəti qurumların uzun müddətdir problemi diqqətdən kənarda saxlaması isə suallar doğurur.
Sumqayıt şəhər rəhbərliyi və müvafiq kommunal qurumlar bu məsələyə biganə qalmamalıdır. Lüdviqshafen parkının, xüsusilə uşaq əyləncə zonasının təcili bərpasına, attraksionların yenilənməsinə və təhlükəsizlik tədbirlərinin gücləndirilməsinə ciddi ehtiyac var. Bu park yalnız uşaqlar üçün əyləncə məkanı deyil, həm də beynəlxalq dostluğun və mədəni əlaqələrin simvoludur.
Uşaqlar üçün yaradılmış məkanlara laqeyd yanaşma yolverilməz olduğu kimi, ölkəmizi beynəlxalq müstəvidə təmsil edən belə rəmzlərin baxımsız vəziyyətdə saxlanılması da qəbuledilməzdir. Lüdviqshafen parkının indiki durumu dəyişdirilməli, park öz tarixi və mənəvi əhəmiyyətinə uyğun şəkildə yenidən qurulmalıdır.
Sumqayıt şəhərinin 9-cu mikrorayonunda yerləşən Lüdviqshafen parkı ilə bağlı səsləndirilən iradlara münasibət bildirilib.
Sumqayıt Şəhər İcra Hakimiyyətindən Xeberle.com-a verilən məlumata görə, sözügedən ərazidə artıq təmizlik işləri aparılıb.
Bildirilib ki, uşaqlar üçün nəzərdə tutulan yer parkın yox, restoranın həyətidir.
Xeberle.com
Xəbərdən istifadə edərkən istinad etmək vacibdir.
