Xəbər verdiyimiz kimi, gecə saatlarında Türkiyənin qərbində - Balıkesirdə 6,1 bal gücündə zəlzələ baş verib. Nəticədə bir neçə bina dağılıb. 19 nəfər isə yaralanıb. Ardınca səhər saatlarında cənub qonuşumuz - İranda da zəlzələ hadisəsi baş verdi. Belə ki, İranın İsfahan əyalətinin şərqindəki Fərxi şəhərində 3,4 bal gücündə zəlzələ qeydə alınıb.
Bəs görəsən, Azərbaycanda gülcü zəlzələ baş verməsi ehtimalı var?
Məsələ ilə bağlı "Unikal"a açıqlama verən Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin baş direktoru Qurban Yetirmişli bildirib ki, əhali narahat olmamalıdır:
"Türkiyədəki zəlzələ indi baş verməyib ki... Aylardır davam edir. Dünən isə güclü zəlzələ baş verdi. Buna baxmayaraq, Türkiyədəki zəlzələnin Azərbaycana təsiri ola bilməz.
Azərbaycanda elə bir seysmogen bölgə yoxdur ki, orada güclü zəlzələ baş verməsi ehtimalı olsun. Xırda təkanlar hər zaman olur. Bu gecə də 17 xırda təkan olub. Heç biri hiss olunmayıb. Bu proseslər hər zaman gedir və getməlidir.
Bir sözlə, Azərbaycanda güclü zəlzələ ehtimalı yoxdur. Vətəndaşlar narahat olmasınlar", - deyə o əlavə edib.
Xəbərdən istifadə edərkən istinad etmək vacibdir.
