Azərbaycan çempionu "Qarabağ” bu mövsüm yenidən tarix yazaraq UEFA Çempionlar Liqasının yeni formatda keçirilən "liga mərhələsinə” yüksəldi. Püşkatmanın nəticəsinə görə Ağdam təmsilçisi dünyanın ən güclü futbol klublarına qarşı mübarizə aparacaq.
Bəs "Qarabağ” bu mərhələdə neçə xal yığa, hansı komandalarla real nəticə əldə edə bilər?
UEFA-nın püşkünə əsasən, "Qarabağ" aşağıdakı klublarla üz-üzə gələcək:
Evdə (Bakıda): "Çelsi” (İngiltərə), "Ayntraxt” Frankfurt (Almaniya), "Ayaks” (Niderland), "Kopenhagen” (Danimarka)
Səfərdə: "Liverpul” (İngiltərə), "Benfika” (Portuqaliya), "Napoli” (İtaliya), "Atletik” Bilbao (İspaniya)
Bu siyahı göstərir ki, Ağdam klubu həm Avropanın nəhənglərinə, həm də güc baxımından daha yaxın rəqiblərə qarşı mübarizə aparacaq.
Bizə tanış rəqib olan "Ayntraxt” Frankfurt Almaniya Bundesliqasının orta səviyyəli təmsilçisidir. Bakıdakı azarkeş dəstəyi ilə "Qarabağ” üçün xal qazanmaq real ehtimaldır.
Danimarka çempionu "Kopenhagen” güclü olsa da, Çempionlar Liqasında sabit nəticələr göstərə bilmir. "Qarabağ” üçün bu görüşdə üç xal almaq ən real imkanlardan biridir.
Avropa futbolunda böyük tarixə sahib olan növbəti tanış rəqib olan "Ayaks” son illərdə əvvəlki gücünü itirib. Təmsilçimiz ağıllı taktika ilə bu oyunda ən azı bir xal qazana bilər.
İspaniyanın La Liqasında orta sıralarda mübarizə aparan "Atletik” Bilbao klubuyla qarşılaşmada da "Qarabağ”ın ümidləri var. Nizamlı müdafiə və sürətli əks-hücumlar İspaniyada xal qazandırma potensialı yaradır.
"Çelsi”, "Liverpul”, "Benfika” və "Napoli” kimi klublar Avropanın ən güclülərindən sayılır. Onlardan xal almaq çətin görünsə də, futbolda sürprizlər həmişə mümkündür. Xatırladaq ki, "Qarabağ” 2017-ci ildə güclü "Atletiko” Madrid ilə qarşılaşmalada 2 dəfə heç-heçə etmişdi. Belə nəticələr bu dəfə də azarkeşlərə sevinc bəxş edə bilər.
Beləliklə, "Köhlən Atlar” üçün bu mövsüm Çempionlar Liqasının "liga mərhələsi” həm böyük sınaq, həm də yeni tarixi səhifədir. Reallıq göstərir ki, Ağdam klubu 6–9 xal toplama potensialına malikdir. Ən çox ümidlər "Ayntraxt”, "Kopenhagen” və "Ayaks” ilə ev oyunlarına, həmçinin "Atletik” Bilbao ilə səfər görüşünə bağlanır.
İnanırıq ki, Azərbaycan futbolunun simvolu olan "Qarabağ” bu mövsüm də Avropanın ən böyük səhnəsində ölkəmizi qürurla təmsil edəcək və azarkeşlərimizə sonsuz sevinc hədiyyələri verəcək.
Elnur Ağayev
Xəbərdən istifadə edərkən istinad etmək vacibdir.
