Bu barədə Xeberle.com-a vəkil Elşad İsayev  məlumat verib. Vəkil qeyd edib ki, məhkəmənin hazırlıq iclasında Sumqayıt Ağır Cinayətlər Məhkəməsinin qərarı ilə işin ibtidai istintaqı zamanı  kobud qanun pozuntularına, o cümlədən müdafiə hüququnun  pozulmasına  yol verildiyi üçün iş istintaqa qaytarılıb: "Bundan sonra istintaq orqanı tərəfindən  məhkəməyə uzadılma ilə bağlı yenidən təqdimat verilib, məhkəmə həbsdə saxlama müddətini  əlavə olaraq 3 ay uzadıb. Həmin qərardan müdafiə tərəfi şikayət verib. Sumqayıt Apelyasiya Məhkəməsinin qərarı ilə Şamaxı rayon Məhkəməsinin qərarı ləğv olunub və həbsdə saxlama müddəti  cəmi bir ay, yəni yanvar ayının 11-nədək uzadılıb ki, müstəntiq işi aidiyyatı üzrə göndərsin. Lakin bütün bunlara baxmayaraq istintaq orqanı kobud səhvləri düzəltmək əvəzinə yenidən həbsdə saxlama müddətinin uzadılması ilə bağlı  Şamaxı rayon Məhkəməsinə müraciət  edib, Şamaxı rayon Məhkəməsinin hakimi, Sumqayıt Apelyasiya Məhkəməsinin mövqeyinə zidd olaraq yenidən həbsdə saxlama müddətinin uzadılması ilə bağlı qərar qəbul edib. Nəticə etibarilə şəxs heç bir əsas olmadan bir ildən çox qanunsuz və əsassız olaraq həbsdə qalıb".

Vəkil bildirib ki, bütün bunlara baxmayaraq istintaq yenidən qanunsuz və əsassız olaraq şəxsin həbsdə qalma müddətinin uzadılması üçün Şamaxı rayon Məhkəməsinə müraciət edib: "Məhkəmə yenidən həbsdə qalma müddətini heç bir əsas olmadan uzadıb.  Qeyd olunan  qərardan müdafiə tərəfi apelyasiya şikayəti verib.   Sumqayıt Apelyasiya Məhkəməsi vəkilin  şikayətini təmin edərək təqdimat vəsatətini rədd edib. Birinci instansiya məhkəməsinin hakimi barədə xüsusi qərar  və təqsirlındirilən şəxsin həbsdən azad olunması barədə ayrıca qərar qəbul edib".

Qeyd edək ki, təqsirləndirilən şəxs 44 günlük Vətən Müharibəsində Füzuli, Tərtər, Ağdərə istiqamətində gedən döyüşlərdə iştirak edib.