Sumqayıt Bələdiyyəsi 65 yaşlı şəhərin ilk yaşayış massivlərindən olan 18-ci məhəllədə yol və səkilərin yenilənməsi üzrə başladığı abadlıq işlərini uğurla davam etdirir. Artıq məhəllədəki binaların bir neçəsini əlaqələndirən daxili yol və səkilərə asfalt döşənmiş, torpaq sahələrinin yararsız hala düşərək əvvəllər gediş-gəlişi çətinləşdirən çökəklik hissələrinə əlavə çınqıl daşınıb-tökülərək hamarlanmışdır. Sakinlərin istəyi nəzərə alınaraq, bəzi yerlərdə yeni piyada yolları salınmışdır.Bugünlərdə məhəllədaxili avtomobil yollarının kənarlarına bardürlərin düzülməsi işləri də başa çatdırılmışdır. Yaxın günlərdə həmin yolların asfaltlanmasına başlanılacaqdır. Aparılan abadlıq işlərinin davamı olaraq, yol və səkilərin kənarlarında ağac və bəzək kolları da əkiləcəkdir.

Orxan MƏMMƏDZADƏ

Xeberle.com