Sumqayıt Gənclər Evində Sumqayıt şəhər Gənclər və İdman Baş İdarəsi və şəhər Veteranlar Şurasının təşkilatçılığı ilə "Azərbaycanda tolerantlıq və multikulturalizm ənənənləri" mövzusunda dəyirmi masa keçirilib.
Dəyirmi masada şəhərin müxtəlif sahələrini təmsil edən ictimai-fəal gənclərlə yanaşı şəhər Veteranlar Şurasının sədr və üzvləri də iştirak ediblər. Tədbiri giriş sözü ilə açan şəhər Veteranlar Şurasının sədri Leyla Qasımova prezident  İlham Əliyevin 2016-cı ilin 11 yanvar tarixli 1673 nömr əli Sərəncamı ilə "2016-cı ilin Azərbaycan Respublikasında "Multikulturalizm ili” elan olunduğunu qeyd edərək, əsrlər boyu müxtəlif millətlərin və dinlərin nümayəndələri Azərbaycanda sülh şəraitində layiqli həyat sürmələrini, onların azadlıq, dostluq mühitində yaşadığını vurğulayıb.
Daha sonra çıxış edənlər şəhər İcra Hakimiyyəti Aparatının ictimai-siyasi və humanitar məsələlər şöbəsi müdirinin müavini Fərman Kazımov, Sumqayıt Cümə məscidinin axundu Hacı Rauf Sərdarov, Baş İdarənin Gənclərlə iş sektorunun baş məsləhətçisi Ceyhun Hüseynov Azərbaycanda hökm sürən etnik və dini tolerantlıq mühitinin dünyaya nümunə olduğunu, ölkəmizdə istər dini, istərsə də milli və irqi ayrı-seçkiliyin olmadığını, Azərbaycanda yaşayan bütün xalqların nümayəndələri, o cümlədən müxtəlif dinlərin təmsilçiləri arasında bir-birinə tolerant yanaşma mövcud olduğunu qeyd ediblər.