Kiçik Azərbaycan hesab etdiyimiz Sumqayıtın Azərbaycanın mədəni əlaqələrində özünəməxsus yeri var. Sumqayıt şəhərinin mədəni əlaqələrinin tarixinə nəzər salanda ilk əvvəl Sumqayıtın qardaşlaşdığı şəhərlərlə münasibətləri əsasən göz önünə gəlir. Sovet dövründə xarici əlaqələrlə bağlı mövcud məhdudiyyətlərə baxmayaraq, Sumqayıt şəhəri bir neçə ölkənin şəhərləri ilə dostluq əlaqələri qurdu. Azərbaycan müstəqillik qazandıqdan sonra da bu əlaqələr genişləndirildi və hazırda da davam etdirilir. Qurulan əlaqələr qardaşlıq səviyyəsinə gəlib çatdı və Sumqayıt şəhəri dünyanın 13 şəhəri ilə qardaşlaşdı.
Sumqayıtla qardaşlaşmış şəhərlərdən biri də Ukraynanın Çerkassı şəhəridir. Azərbaycan və Ukrayna Respublikaları Nazirlər Kabinetləri arasında gənclər siyasəti və idman sahəsində əməkdaşlıqla əlaqədar 2001-ci il 16 oktyabrında saziş imzalanıb. Sumqayıtın keçmiş qardaşlaşmış şəhərlər əlaqəsi olan Ukrayna Respublikasının Çerkassi şəhəri ilə dostluq və partnyorluq əlaqələrinin bərpasına 2003-cü ildə nail olundu. 2003-cü ilin sentyabr ayında Sumqayıt şəhərinin nümayəndə heyəti Çerkassı şəhərində səfərdə olub və iki şəhər arasında qardaşlaşmış şəhərlər əlaqəsinin bərpası ilə bağlı Saziş imzalanıb.
Sumqayıtda Çerkassı şəhərinin adını daşıyan küçə də var. Sözügedən küçə bir neçə il bundan öncə təmir olunsa da, hazırda pis vəziyyətə qalıb. Və yenidən həmin  küçədə təmir işləri aparılır.
Çerkassı şəhərində isə "Sumqayıt” adlı küçə var. Şəhərimizin adını daşıyan bu küçə böyük bir ərazini əhatə edir, burada ticarət obyektləri və dövlət idarələri yerləşir.
Xeberle.com "Sumqayıt” küçəsinin fotolarını təqdim edir: