Sumqayıt şəhər Gənclər və İdman Baş İdarəsinin təşkilatçılığı ilə "Sumqayıt Gənclər Evi”ndə şəhərin müxtəlif sahələrini təmsil edən ictiami-fəal gənclər, tələbə gənclər və qeyri-hökumət gənclər təşkilatlarının fəal nümayəndələrinin iştirakı ilə "Xocalı Soyqırımı”na həsr olunmuş tədbir keçirilib.
Tədbir iştirakçıları əvvəlcə Gənclər Evinin rəsm dərnəyinin əl işlərindən ibarət "Xocalıya Ədalət” adlı sərgi ilə tanış olublar.
Sonra təşkil olunan dəyirmi masa iştirakçılarına ermənilərin və Ermənistanda yerləşən Rusiya motoatıcı diviziyasının Xocalıda törətdikləri soyqırım haqında məlumatı özündə əks etdirən videoçarx nümayiş etdirilib.
Tədbirdə çıxış edən şəhər Gənclər və İdman Baş İdarəsinin rəis əvəzi Mübariz Bəşirov Dövlətimizin və Heydər Əliyev Fondu tərəfindən Xocalı Soyqırımı barədə həqiqətlərin dünya ictimaiyyətinə çatdırılması istiqamətində apardığı siyasətdən və görülən məqsədyönlü işlərdən, ermənilərin havadarlarının köməyi ilə işğalçı siyasətindən, müxtəlif illərdə xalqımıza qarşı törətdiyi vəhşiliklərdən və bu kimi faciələrə dünya ictiimaiyyətinin biganəliyindən danışıb. Hər hansı bir təşkilatın təşəbbüsü olmadan gənclərimizə insanlığa sığmayan hərəkətlərin-soyqırımların Beynəlxalq aləmə çatdırılmasında fəal olmağı tövsiyə edib.
Sumqayıt şəhər Təhsil Şöbəsinin metodisti Gülbahar Haqverdiyeva, Gənclər Evinin əlaqələndiricisi Pəri Vəliyeva, əslən Xocalıdan olan gənc İlahə Məmmədova hadisələrlə bağlı məruzə ilə çıxış ediblər.
Sonda Baş İdarənin şəhər Təhsil şöbəsi ilə birgə təşkil etdiyi IX-XI sinif şagirdləri arasında ingilis dilində "Xocalıya Ədalət” adlı inşa və rəsm-sərgi müsabiqəsinin qalibləri mükafatlandırılıb.