Haqqında çox yazmaq olar Rüstəm müəllimin. Baxmayaraq ki, biri- birimizi daha yaxın dost olaraq tanımağımız cəmi 4-5 il olardı... Keçmiş zamanda onun haqqında danışmaq qəbul olunmazdı…

Düzdür, bu insan cismən aramızda yoxdur. Amma onun əməlləri,onun gülərüzlü siması, zarafatları…. bunları unutmaq qeyri mümkündür... Çıxışlarımda hər zaman qeyd etmişəm: "Mən Sumqayıta bağlı insanam!Sumqayıtı sevirəm!”

Bəlkə də bu kimin üçünsə pafoslu səslənə bilər, amma bu həqiqətən belədir. Bəlkə də bizi birləşdirən, daha da yaxın dost edən bir amil də bu idi.. Bəli, Rüstəm müəllim də Sumqayıt haqqında kitab yazırdı. Sumqayıtın tarixi haqqında...

Çox həvəsli idi... İşlədiyim Sumqayıtın Tarixi Muzeyi ilə əməkdaşlıq edirdi buna görə. Tez-tez gəlirdi, kitab haqqında fikirləri, elmi məlumatları, tarixi faktları müzakirə edərdik. Çox həvəsli idi bu kitabın çıxmasında…Heyf…

Zarafatcıl insan idi... Üzü nurlu, gülərüz siması... Həyatsevər idi bir sözlə... Hər bir situasiyada bir zarafat atmasa olmazdı…

Bayağı yox, mənalı zarafat edirdi. Təbəssümü ilə onun çəkdiyi adi bir yarızarafat el məsəli,və ya atalar sözü belə istər istəməz insanda gülüş yaradardı…

Hər kəsin yaxşılığını istərdi bu insan. Əsəbləşməzdi. Heç kimin xətrinə dəyməzdi. Kim nə xahiş edərdisə, canla – başla yerinə yetirərdi. İstəməzdi ki, kiminsə ona kömək üçün uzanan əlini boş qaytarsın...

Son görüşümüz kiçik bir toplantıda oldu. Ölümündən hardasa 3 həftə əvvəl... Maraqlıdır,işi çox idi deyə, baş qarışıq idi deyə ya nədəndir bilmirəm, Rüstəm müəllimlə aramızda kiçicik bir anlaşılmazlıq oldu. Bir az əsəbi idi.Həm də yorğun... Və kiçik toplantı bitəndən biraz sonra iş əsnasında mən bir neçə faktı dəqiqləşdirmək üçün Rüstəm müəllimə zəng etdim... Bayaqki o əsəbi tondan əsər - əlamət qalmamışdı.Yenə də o mülayim səs,o diqqət,o zarafatlar…Və sonda gülüşlə sağollaşmaq…Sonuncu dəfə… Rüstəm müəllim mənim üçün yaşayır. Yaşayacaq! Çünki o mənim üçün, bu gənclər üçün, Sumqayıt üçün çox şeylər edib..Etdikləri ilə yaşayır.Yaşayacaq!Ondan mənə qalansa iki yadigar var. Hər gün taxdığım qızıldan da qiymətli olan toqqa… Və bir də ilk kitabımı nəşr etdirmək üçün Gənclər fondunun təşkil etdiyi müsabiqəyə necə ərizə göndərməyi mənə izah edərkən öz şəxsi xətti ilə yazdığı yazısı...

Aydın Şahid