Sumqayıt şəhərinin Corat qəsəbəsində yağan güclü yağışlar yenidən illərlə həllini tapmayan problemi üzə çıxarıb. Qəsəbənin bir çox küçələrində yağışdan sonra yol tam keçilməz hala düşüb. Sakinlərin Xeberle.com-a bildirdiyinə görə, xüsusilə səhər saatlarında məktəbə gedən uşaqlar palçığa batmış küçələri keçməkdə ciddi çətinliklərlə üzləşirlər.
Valideynlər bildirirlər ki, qəsəbədə yağışlı günlərdə hərəkət etmək təhlükəli olur. Küçələrdə su yığıntıları yaranır, bəzi yerlərdə gölməçələr müşahidə edilir. Nəticədə məktəblilər dərsə gecikir, valideynlər isə uşaqları təhlükəsiz şəkildə məktəbə çatdırmaq üçün əlavə yollar axtarmağa məcbur qalırlar.
Sakinlər uzun illərdir bu problemin həllini gözlədiklərini deyirlər. Onların fikrincə, qəsəbənin yollarında normal drenaj sistemi qurulmadığı üçün hər yağışdan sonra eyni mənzərə təkrarlanır. Məsələ ilə bağlı aidiyyəti qurumların təcili tədbir görməsi, yolların bərpası və suötürücü xətlərin yenilənməsi tələb olunur.
Corat qəsəbəsində yaşanan bu vəziyyət təkcə sakinlərin gündəlik həyatını çətinləşdirmir, həm də təhlükəsizlik baxımından ciddi narahatlıq yaradır. Qəsəbə sakinləri problemin köklü şəkildə həll olunacağı günü səbirsizliklə gözləyirlər.
Xəbərdən istifadə edərkən istinad etmək vacibdir.
