"Azərbaycan Zəngəzur dəhlizinə nəzarət etmədən sülhə imza atmamalıdır."
Politoloq Əhəd Məmmədli Xeberle.com-a açıqlamasında Azərbaycan Prezidenti İlham Əliyevlə Ermənistanın baş naziri Nikol Paşinyan arasında ABŞ-da gözlənilən görüşə münasibət bildirib. O, qeyd edib ki, hazırkı mərhələdə sülh müqaviləsinin imzalanması Azərbaycanın maraqlarına cavab vermir.
"Azərbaycan müharibənin qalibidir və bu, danılmaz faktdır. Amma indi bizi Ermənistanla bərabərhüquqlu sülhə razı salmaq istəyirlər. Bu, qəbuledilməzdir. Ən azı Zəngəzur dəhlizinə tam nəzarət təmin olunmadan heç bir sülh sənədinə imza atılmamalıdır”, – deyə politoloq bildirib.
Ə.Məmmədli 1994-cü ildəki vəziyyəti xatırladaraq, Ermənistanın həmin dövrdə işğal altında saxladığı ərazilərə baxmayaraq, sülh müqaviləsi imzalamadığını vurğulayıb:
"1994-cü ildə Ermənistan Azərbaycan torpaqlarının 20 faizini işğal altında saxlayırdı. Buna baxmayaraq, sülh müqaviləsinə imza atmadı. İndi isə niyə biz qalib tərəf olaraq, öz şərtlərimizi irəli sürmədən belə bir sənədə razılaşmalıyıq? Biz öz tələblərimizi ortaya qoymalı və qəbul etdirməliyik. Hədəflərimizə çatmadan heç bir sülh imzalanmamalıdır. Əminəm ki, Prezident İlham Əliyev də bu reallığı nəzərə alaraq, indiki şərtlərlə sənədə imza atmaz.”
Xəbərdən istifadə edərkən istinad etmək vacibdir.
