"Sumqayıt" Futbol Akademiyasının koordinatoru Hakan Sünalın Almaniyaya dönməsinin səbəbi klubla müqavilə imzalamaması deyil, məzuniyyətə çıxmasıdır.
Bu barədə Oxu.Az-ın sorğusunu cavablandıran "Sumqayıt" klubunun mətbuat katibi Zaur Xudiyev bildirib.
Onun sözlərində görə, klubla Hakan Sünal arasında heç bir problem yoxdur.
"Hakan hoca hazırda məzuniyyətdədir və Almaniyaya, ailəsinin yanına dönüb. Bu ayın sonunda Azərbaycana qayıdacaq. Klubla onun arasında hansısa bir anlaşılmazlıq, narahatlıq yaradacaq problem yoxdur", - deyə Z.Xudiyev bildirib.
Qeyd edək ki, türkiyəəsilli almaniyalı mütəxəssis artıq 6 ilə yaxındır ki, "kimyaçılar"ın futbol akademiyasına rəhbərlik edir. Onun dönəmində akademiyanın bir neçə üzvü müxtəlif yaş qrupları üzrə millilərə dəvət alıb.
Xəbərdən istifadə edərkən istinad etmək vacibdir.
