Sumqayıt şəhər İcra Hakimiyyəti və Gənclər və İdman Baş İdarəsinin birgə təşkilatçılığı ilə 1988-ci ilin fevralında Sumqayıtda ermənilər tərəfindən törədilmiş hadisələrin 27-ci ildönümünə həsr olunmuş 1988-ci il erməni təxribatı-Sumqayıt hadisələri” adlı dəyirmi masa təşkil edilib. Sumqayıt şəhər Heydər Əliyev Mərkəzində keçirilən tədbir şəhərin müxtəlif sahələrini təmsil edən yüzdən çox gəncin iştirakı ilə baş tutub. Tədbiri giriş sözü ilə açan şəhər İcra Hakimiyyəti başçısının müavini Elgin Həbibullayev tədbirin keçirilmə məqsədindən, Sumqayıtda törədilmiş hadisələri doğuran səbəblərdən, bu hadisələrin əvvəlcədən planlaşdırılaraq məqsədli şəkildə törədildiyindən danışıb. Eyni zamanda o, bildirib ki, Sumqayıt hadisələri ermənilərin Azərbaycana qarşı separtçı və təcavüzkar siyasətinin istinad nöqtəsi olmuşdur. Bu gün Azərbaycan xalqının başına gətirilən müsibətlərin dünya ictimaiyyətinə çatdırılmasının zəruriliyinə vurğulayan natiq bu işdə cəmiyyətin hər bir fərdinin xüsusilə də gənclərin üzərinə böyük məsuliyyətin düşdüyünü qeyd edib. Diskussiya şəraitində keçən tədbirdə Gənclər və İdman Baş İdarəsinin rəisi Elşən Baxşəliyev, Sumqayıt hadisələrinin tədqiqatçılarından olan əməkdar jurnalist Eyruz Məmmədov, tarix üzrə fəlsəfə doktoru Aydın Məmmədov, Yeni Azərbaycan Partiyası Sumqayıt şəhər təşkilatı İdarə Heyətinin üzvü Ceyhun Məmmədov, Sumqayıt Dövlət Universitetinin tələbəsi Arzu Nəbizadə də çıxışlarında Sumqayıt hadisələrinin əsl mahiyyəti və baş vermə səbəbləri haqqında ətraflı danışıb və Sumqayıtda törədilən hadisələrin ermənilərin "Böyük Ermənistan” adlı məkrli planının bir hissəsi olduğunu, xalqımızın başına gətirilmiş faciələrin beynəlxalq ictimaiyyətə düzgün çatdırılması istiqamətində görülən işlərin daha da genişləndirilməsinin vacibliyi vurğulayıblar.

Xeberle.com