İstedadlı gənclərin beynəlxalq olimpiadalarda əldə etdikləri nailiyyətlər ölkəmizi təmsil etmələri baxımından xüsusi önəm daşıyır. Belə şagirdlərdən biri də Sumqayıt şəhəri "İstedad” liseyinin 10-cu sinif şagirdi Selcanxatun Salamzadədir. O, ingilis dili və digər fənlər üzrə müxtəlif olimpiadalarda iştirak edir, həm ciddi təhsili, həm də şəxsi inkişafını paralel şəkildə uğurla davam etdirir. Xeberle.com-un əməkdaşı onunla həm uğurlarının sirri, həm də gələcək hədəfləri barədə söhbətləşib.
- İlk dəfə olimpiadalara marağın necə yarandı?
İlk dəfə 7-ci sinifdə olimpiadalara marağım yarandı. İştirak etdiyim ilk olimpiadada nəticəm yüksək olmasa da, ruhdan düşmədim.
- Oxuduğun məktəb sizə hansı üstünlükləri qazandırır?
Oxuduğum məktəb və mənə ingilis dilini tədris etmiş Vəfa müəllimə bu və gələcək uğurlarıma çox kömək olub. Bu günə qədər ona minnətdaram.
- Gündəlik həyatında səni ən çox motivasiya edən nədir?
Məni ən çox motivasiya edən gələcək həyatım haqqında düşündüyüm xəyallar və özümə olan sonsuz inamımdır.
- Olimpiadada medal qazanmaq üçün hazırlıq prosesin necə keçdi?
Hazırlıq prosesim əvvəlcə yaxşı qoyulmuş ingilis dili təməli üzərində qurulurdu. Müəlliməm mənimlə diqqətlə məşğul olurdu və lazımi bilikləri formalaşdırmağa kömək edirdi. Hazırda isə hazırlığımı özüm davam etdirirəm.
- Beynəlxalq yarışlarda iştirak sənə ən çox nə öyrədib?
Beynəlxalq olimpiadalarda iştirak mənə üstün yerlərə layiq olduğumu göstərib və özümə inamımı artırıb.
- Digər ölkələrin iştirakçıları ilə rəqabət səni necə motivasiya edir?
Hər bir ölkəyə qarşı böyük hörmətim var, amma azərbaycanlı şagirdlərinin necə ağıllı və çalışqan olduğunu göstərmək mənə əlavə motivasiya verir.
- Gələcəkdə hansı sahə üzrə ixtisaslaşmaq istəyirsən?
Gələcəkdə "Information Technology” sahəsində ixtisaslaşmaq istəyirəm.
- Daha hansı beynəlxalq olimpiadalarda iştirak etməyi planlaşdırırsan?
Əsasən ingilis dili üzrə Hippo və FISO olimpiadalarına üstünlük verirəm, amma riyaziyyat olimpiadalarına da qatılmağı düşünürəm.
- Özün üçün yaxın 5 ildə ən böyük məqsədin nədir?
Ən böyük məqsədim IT sahəsində ixtisasa malik olub xaricdə universitetdə təhsil almaq və yeni həyata başlamaqdır.
- Bu uğurları qazanmağında müəllimlərinin və ailənin rolu nədən ibarətdir?
Mənə inandıqları və dəstək olduqları üçün həm müəllimlərimə, həm də valideynlərimə minnətdaram.
- Dərslərlə məşğuliyyətini və istirahəti necə balanslaşdırırsan?
Qarşıma məqsəd qoyduğum üçün həvəslə çalışır və eyni zamanda istirahət etməyə də vaxt ayırıram.
- Dostların və sinif yoldaşların uğurlarına necə reaksiya verir?
Rəfiqələrim hər zaman məni dəstəkləyir və cəsarətləndirirlər.
- Boş vaxtlarında ən çox nə ilə məşğul olursan?
Boş vaxtlarımda rus və fransız dillərini öyrənir, IT sahəsinə aid proqramlar araşdırıram.
- Səni bir cümlə ilə xarakterizə etməli olsan, bu nə olardı?
Qarşıma hədəf qoyub ona sistemli şəkildə çatan, prinsipial və davamlı inkişaf etməyə önəm verən biriyəm.
- Olimpiadalardan kənar hansı hobbilərin var?
Hobbilərim rəsm çəkmək (bu yay Uşaq İncəsənət Festivalında iştirak etmişdim), yeni dillər öyrənmək, film izləmək və kitab oxumaqdır.
- Sənin kimi yüksək nəticələr qazanmaq istəyən yaşıdlarınıza hansı məsləhətləri verərdin?
Onlara ətrafdakı insanların sözlərinə həddən artıq fikir verməməyi və özlərinə inanmağı məsləhət görərdim. Hər birinə gələcəkdə uğurlar arzulayıram.
- Bizimlə həmsöhbət olduğun üçün təşəkkür edirik.
Sağ olun.
Elşən YƏHYAYEV,
Xeberle.com
Xəbərdən istifadə edərkən istinad etmək vacibdir.
