Bakının Binəqədi rayonundakı Əliağa Şıxlinski adına 135 nömrəli tam orta məktəbin coğrafiya müəllimi Züleyxa Rövşən qızı Məmmədova müəllimlərin sertifikasiya imtahanında yüksək nəticə göstərərək 60 baldan 59 bal toplayıb.
Sertifikasiya prosesi ölkəmizdə təhsilin keyfiyyətini yüksəltmək, müəllimlərin bilik və bacarıqlarını obyektiv qiymətləndirmək məqsədi daşıyır. Züleyxa müəllimənin bu nailiyyəti onun fədakar əməyi, məsuliyyətli yanaşması və daim üzərində çalışmasının nəticəsidir.
O, uğurunun səbəblərini belə izah edir:
"Uğur heç vaxt təsadüf olmur. Bu nəticəyə ciddi səylə, fənnə olan sevgimlə və fasiləsiz zəhmətimlə çatmışam. Şagirdlərimə yalnız bilik yox, həm də əzmkarlıq və məsuliyyət hissi aşılayıram. Müəllimlik mənim üçün sadəcə peşə deyil, həyat tərzidir.”
Coğrafiya fənnini şagirdlərə sevdirən, dərslərində müasir və yaradıcı metodlara üstünlük verən Züleyxa müəllimə pedaqoji fəaliyyəti və insani keyfiyyətləri ilə məktəb kollektivində seçilən simalardandır. Onun bu uğuru məktəb kollektivi və təhsil ictimaiyyəti tərəfindən sevinc və iftixarla qarşılanıb.
Bu nəticə bir daha sübut edir ki, inkişaf yönümlü, yeniliyə açıq və məsuliyyətli müəllimlər sertifikasiya prosesində uğur qazana bilirlər.
Xəbərdən istifadə edərkən istinad etmək vacibdir.
