Vaxtaşırı istedadlı gənclərin, uğur qazanmış tələbə və şagirdlərin nəticələrini, onların həyat hekayələrini paylaşmağa davam edirik.
Bu dəfə sizi istedadlı və əzmkar bir məktəbli — Mahmudzadə Cavidan Salman oğlu ilə tanış etmək istərdik. Uşaqlıqdan elmə, xüsusilə də riyaziyyata böyük maraq göstərən Cavidan artıq beynəlxalq arenalarda Azərbaycan bayrağını qürurla dalğalandırmaqdadır. O, uğurlarının sirrini zəhmətdə, məqsədli çalışmaqda və heç vaxt ruhdan düşməməkdə görür. Bu müsahibədə biz onun həyat yolu, olimpiadalara hazırlıq prosesi, gələcək planları və tövsiyələri haqqında daha ətraflı məlumat alacağıq.
- Cavidan səni yaxından tanıyaq.
- Mən Mahmudzadə Cavidan Salman oğlu 2010-cu ildə Bakı şəhərində anadan olmuşam. 2014-cü ildə 125 saylı bağçaya, 2017-ci ildə isə A.Hüseynzadə adına 20 saylı məktəb-liseyə qəbul olunmuşam. Məktəbə başladığım ilk gündən dərslərə böyük maraq göstərmişəm. Riyaziyyata xüsusi həvəsim olub və bu sahədə daim inkişaf etməyə çalışmışam. Məktəb daxilində və kənarda keçirilən sınaq və yarışlarda iştirak edərək uğurlar qazanmışam. Hazırda beynəlxalq olimpiadalarda ölkəmizi təmsil edirəm və bu sahədə fəaliyyətimi davam etdirirəm.
- Həyatında beynəlxalq olimpiadaların rolunu necə qiymətləndirərdiniz?
- Beynəlxalq olimpiadalar mənim üçün yalnız yarış deyil, həm də özümü sınamaq, inkişaf etdirmək və ölkəmi təmsil etmək üçün böyük fürsətdir. Bu yarışlar mənə daha planlı və məqsədli çalışmağı öyrədib, dünya səviyyəsində rəqabət aparmaq bacarığı qazandırıb. Uğurlarım özümə olan inamımı artırıb və daha yüksək hədəflərə yönəlməyimə səbəb olub.
- Olimpiadaya hazırlıq zamanı nələrə diqqət edirdin?
- Hazırlıq zamanı əsasən planlı çalışmağa, vaxtımı düzgün bölməyə və mövzuya dərindən yiyələnməyə diqqət edirdim. Eyni zamanda, fiziki və zehni sağlamlığımı qoruyur, istirahətə və idmana da vaxt ayırırdım. Özümə inam və motivasiya mənim üçün əsas aparıcı amillərdən biri olub.
- Bu uğurlarınla bağlı Elm və Təhsil Nazirliyi tərəfindən sənə dəstək gəldimi?
- Bəzi hallarda uğurlarım məktəb və rayon səviyyəsində qiymətləndirilib. Düşünürəm ki, beynəlxalq səviyyədə olan uğurlarımın daha geniş şəkildə dəstəklənməsi və tanınması mənə gələcəkdə daha böyük motivasiya verə bilər.
- Müxtəlif ölkələrin təmsilçiləri və təhsil sistemlərinin mübarizəsində bəyəndiyin hansı sistem var ki, onun ölkəmizdə tətbiqini istərdin?
- Bəzi ölkələrdə – xüsusilə Sinqapur və Cənubi Koreyada riyaziyyatın tədrisinə çox ciddi yanaşılır. Şagirdlərin düşünmə qabiliyyətini inkişaf etdirən, yaradıcı və məntiqi yanaşmalar tədris prosesinə daxil edilir. Belə bir sistemin ölkəmizdə də tətbiqi şagirdlərin analitik düşünmə bacarığını artırar və beynəlxalq uğurların sayını çoxaldar.
- Olimpiada qalibi kimi uğurlarının sirrini necə izah edərdin?
- Uğurlarımın sirri əzm, planlı çalışma, məqsəd qoymaq və özümə inamdır. Hər zaman inanıram ki, istəsəm, çalışsam, bacararam. Məğlubiyyətlər mənə dərs olur və məni daha güclü edir. Hər uğur zəhmətin nəticəsi kimi mənə xüsusi zövq verir.
- Uğurlarında müəllimlərinin rolunu necə qiymətləndirərdin?
- Müəllimlərimin üzərimdə böyük əməyi olub. Onların verdiyi dəstək, əlavə dərslər və motivasiya mənim uğurlarıma mühüm təsir göstərib. Onlar yalnız bilik verməyib, eyni zamanda, mənə özümə inanmağı da öyrədiblər.
- Səncə, olimpiadalara hazırlıq hansı yaşdan başlanmalıdır, şagirdlərə hər hansı tövsiyələrin varmı? Bu sahədə təcrübə və biliklərini bölüşməyin maraqlı olardı.
- Məncə, olimpiadalara hazırlıq üçün ən ideal yaş ibtidai siniflərdir. Bu yaşda təməl biliklər formalaşır və düşüncə çevik olur. Şagirdlərə tövsiyəm odur ki, vaxtlarını düzgün bölsünlər, maraq duyduqları sahəni dərindən öyrənsinlər və heç vaxt ruhdan düşməsinlər. Öz təcrübəmi dostlarımla və kiçik sinif şagirdləri ilə bölüşməyə çalışıram.
- Gələcək planların barədə nə deyə bilərsən? Gələcəkdə özünü harada görürsən?
- Gələcəkdə elm və texnologiya sahəsində uğur qazanmaq, beynəlxalq səviyyədə tanınan alim və ya mühəndis olmaq istəyirəm. Hədəfim yalnız fərdi uğurlar deyil, həm də ölkəmin elmi inkişafına töhfə verməkdir. Özümü gələcəkdə dünya səviyyəsində tanınmış bir innovator və elm adamı kimi görürəm.
- Bir şagirdin beynəlxalq uğur qazanmaq üçün ən vacib xüsusiyyət nədir?
- Ən vacib xüsusiyyət əzm və davamlı çalışmaqdır. Heç vaxt "bacarmaram” deməmək və məqsədindən dönməmək lazımdır. Özünə inanan və zəhmət çəkən hər kəs uğur qazana bilər. Məğlubiyyətlər də bu yolun bir hissəsidir və insanı daha da möhkəmləndirir.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
