Sumqayıtda bəzən obyekt yerləri çox yöndəmsiz, tikinti qanunvericiliyinə uyğun olmayan şəkildə və praktik olmayan formada tikilir. Bunun da bir çox səbəbi var. Bu tip obyektlərdən birinin fundamenti 6-cı mikrorayon ev 23 və ev 27-nin arasında olan ərazidə, su və qaz xətlərinin lap yaxınlığında tökülüb. Bu ərazi həm də ətraf binaların məişət tullantılarını atdığı yerin bir addımlığındadır. Belə görünür ki, obyekt sahibi tikintini sürətlə bitirmək niyyətindədir, çünki fundament dünən - bir gecənin içində hazır olub. Sahibkarın bu operativliyini lap alqışlamaq olar... Amma...
Təəssüf ki, bu obyekt sahibi sakinlərin yolunu kəsib. Bu da sakinlər tərəfindən ciddi narazılıqla qarşılanıb.
Xeberle.com-un əldə etdiyi məlumata görə, bundan MİS-in xəbəri yoxdur. Deyilənə görə orada avto yuyucu tikəcəklər.
Deyəsən belə getsə sakinlər bloklardan çölə çıxa bilməyəcək. Obyektlər tikilə-tikilə gəlib şəhərin içindən həyətlərimizə, blokumuzun ağzına çıxıb. Aidiyyəti qurumlar hara baxır?! Görməmişdilərsə, biz artıq göstərdik.
Mövzuya qayıdacağıq.

Ramil Zeynallı
Xeberle.com