Mənzil İnşaatı Dövlət Agentliyinin (MİDA) tabeliyində fəaliyyət göstərən "MİDA" MMC Abşeron rayonu, Saray qəsəbəsində 4.5 hektar ərazidə inşa ediləcək çoxmənzilli yaşayış və qeyri-yaşayış binaları üzrə növbəti tenderini keçirib.
Oxu.Az xəbər verir ki, MMC-nin keçirdiyi sonuncu satınalma müsabiqəsinin qalibi "Yar İnşaat Təmir-Tikinti" MMC olub. Şirkətlə bağlanan müqavilənin məbləği 20 milyon 310 min 580 manat təşkil edir. Şirkət 5 nömrəli 12 mərtəbəli, həmçinin 6 və 7 nömrəli 16 mərtəbəli çoxmənzilli yaşayış binalarının tikintisini həyata keçirəcək.
Noyabrın 21-də keçirilən tenderin qalibi isə "GM Construction" MMC olmuşdu. 31 milyon 255 min 488 manat 1 qəpik məbləğində olan tenderin şərtlərinə görə, 8 və 9 nömrəli 16 mərtəbəli, həmçinin 10, 11 və 12 nömrəli 12 mərtəbəli yaşayış binalarının tikintisi, eləcə də 13 nömrəli birmərtəbəli qeyri-yaşayış binası inşa olunmalıdır.

Noyabrın 18-də başa çatan müsabiqəni isə "Hünər-İnşaat" firması qazanıb. 26 milyon 369 min 453 manat məbləğində olan müqavilənin şərtlərinə görə, şirkət 1 və 4 nömrəli 12 mərtəbəli, 2 və 3 nömrəli 16 mərtəbəli yaşayış binalarının, həmçinin 14 və 15 nömrəli bir mərtəbəli qeyri-yaşayış binalarının tikintisini həyata keçirməlidir.
Beləliklə, Saray qəsəbəsində həyata keçiriləcək tikinti layihələrinin ümumi dəyəri 77 milyon 935 min 521 manata çatır.

Xəbərdən istifadə edərkən istinad etmək vacibdir.