Heydər Əliyev Fondunun "Talassemiyasız həyat naminə” proqramı çərçivəsində Sumqayıtda qanvermə aksiyası keçirilib.
Heydər Əliyev Fondunun həyata keçirdiyi "Talassemiyasız həyat naminə” proqramı çərçivəsində Sumqayıt şəhərində genişmiqyaslı qanvermə aksiyası təşkil olunub. Aksiya Respublika Qan Bankı, Sumqayıt Şəhər İcra Hakimiyyəti və Sumqayıt Tibb Mərkəzinin birgə təşkilatçılığı ilə baş tutub.
Xeyriyyə məqsədi daşıyan tədbirin əsas məqsədi talassemiya və digər qan xəstəliklərindən əziyyət çəkən insanlara yardım etmək, həmçinin cəmiyyətdə donor hərəkatının genişlənməsinə töhfə verməkdir. Aksiya çərçivəsində yüzlərlə şəhər sakini, dövlət qurumlarının əməkdaşları, səhiyyə işçiləri və könüllülər fəal şəkildə iştirak edərək qan veriblər.
Tədbir zamanı həkimlər tərəfindən donorların sağlamlıq vəziyyəti yoxlanılıb, qanvermənin əhəmiyyəti ilə bağlı maarifləndirici söhbətlər aparılıb.
Sumqayıt Şəhər İcra Hakimiyyətinin rəsmiləri bildiriblər ki, bu cür aksiyaların keçirilməsi humanist dəyərlərin təbliği baxımından olduqca əhəmiyyətlidir və gələcəkdə də davamlı olaraq təşkil ediləcək. Onların sözlərinə görə, şəhər əhalisinin fəal iştirakı Sumqayıtda sosial həmrəyliyin və ictimai məsuliyyətin yüksək səviyyədə olduğunu bir daha nümayiş etdirir.
Aksiyada iştirak edən vətəndaşlar isə belə təşəbbüslərin həm sağlamlıq, həm də humanizm baxımından vacib olduğunu vurğulayaraq, qan verməyin hər bir insan üçün mənəvi borc olduğunu qeyd ediblər.
Xəbərdən istifadə edərkən istinad etmək vacibdir.
