Ölkəmizdə şəhid ailələrinə və qazilərimizə göstərilən diqqət və qayğı dövlət siyasətinin əsas istiqamətlərindən biridir. Bu barədə Milli Məclisin deputatı Hicran Hüseynova məlumat verib.
Deputat qeyd edib ki, Vətənimizin azadlığı və ərazi bütövlüyü uğrunda canından keçən şəhidlərimizin ailələri, sağlamlığını itirərək qəhrəmanlıq göstərən qazilərimiz daim dövlətin xüsusi himayəsindədir:
"Möhtərəm Prezidentimiz cənab İlham Əliyevin rəhbərliyi, hörmətli Birinci vitse-prezident Mehriban xanım Əliyevanın humanitar missiyası sayəsində bu sahədə mühüm işlər görülür. Mənzil və avtomobil təminatı, sosial müdafiə tədbirləri, sağlamlıqlarının bərpası və məşğulluq məsələləri onların rifahına yönəlmiş addımların yalnız bir hissəsidir.”
Hicran Hüseynova bildirib ki, ötən il Vətən müharibəsi qazisi, birinci qrup əlil Əzizov Rəvanın evində olub, sosial rifahı və həyat şəraiti ilə bağlı məsələləri müzakirə edərək bir sıra müraciətləri icraata götürüb.
Millət vəkili həmçinin vurğulayıb ki, Heydər Əliyev Fondunun vitse-prezidenti Leyla Əliyevanın təşəbbüsləri nəticəsində qazimizin sağlamlıq vəziyyəti və gündəlik həyat şəraiti xeyli yaxşılaşıb:
"Leyla xanım Əliyeva Vətən müharibəsi qazisi Rəvanın sağlamlığı və həyat şəraitinin yaxşılaşdırılması üçün mühüm təşəbbüslər göstərmişdir. Bu səylər sayəsində Rəvan balamızın vəziyyəti bu gün istəklərinə uyğundur.”
Deputatın sözlərinə görə, Sumqayıt Şəhər İcra Hakimiyyətinin başçısı Zakir Fərəcov da qazinin sağlamlığı və sosial rifahı ilə bağlı məsələlərə həssaslıqla yanaşır, daim diqqət və qayğı göstərir.
Bu gün keçirilən vətəndaş qəbulu zamanı qazinin dövlətin ona göstərdiyi qayğıya görə minnətdarlığını bildirdiyini vurğulayan Hicran Hüseynova, ona möhkəm can sağlığı, uzun ömür və xoşbəxt həyat arzulayıb.
"Şəhid ailələrimiz və qazilərimiz dövlətimizin daim diqqət mərkəzindədir – bu, həm xalqımızın milli-mənəvi borcudur, həm də Prezidentimiz və Mehriban xanımın həyata keçirdiyi siyasətin bariz təzahürüdür.” – deyə millət vəkili bildirib.
Qeyd edək ki, bu il Sumqayıta səfərləri zamanı Leyla xanım Əliyeva və Arzu xanım Əliyeva Vətən müharibəsi qazisi Əzizov Rəvan üçün inşa edilən evlə də tanış olublar.
Xəbərdən istifadə edərkən istinad etmək vacibdir.
