Uşaqlıqdan atası ilə birlikdə elektrik cihazlarının içində böyüyən sumqayıt məktəblisi Həmid Məmmədli bu gün robototexnika sahəsində ölkəmizin adını beynəlxalq arenalarda tanıdır. Məktəb illərini qızıl nişanla tamamlayan, STEAM layihələrində qalib olan, beynəlxalq yarışlarda Azərbaycanı təmsil edib birinciliklər qazanan bu gənc, nəhayət dünya üzrə qəbul şansı 4%-dən az olan "Türkiye Scholarships" proqramı ilə İstanbul Teknik Universitetinə qəbul olunaraq arzularına bir addım daha yaxınlaşıb.
TEKNOFEST kimi nəhəng texnoloji yarışlarda qalib gələn ilk və yeganə Azərbaycan komandasında kapitan olan Həmidin hədəfi təkcə öz gələcəyini qurmaq deyil — həm də Azərbaycanın müdafiə sənayesinə və texnoloji inkişafına töhfə verməkdir.
Xeberle.com-un əməkdaşı Həmid Məmmədli ilə motivasiya dolu həmsöhbət olub. Robototexnika sahəsində beynəlxalq yarışlarda birinciliklər qazanan, Azərbaycanda keçirilən tədbirlərdə isə artıq koordinator və hakim kimi çıxış edən Həmidin hekayəsi yüzlərlə gəncə ilham verəcək gücdədir.
- Özünüzü qısa şəkildə təqdim edə bilərsinizmi?
Mən Həmid Məmmədli, Qubadlı rayon Cəlal Həşimov adına Mərdanlı tam orta məktəbin məzunuyam. 11 illik təhsilimi qızıl nişanla və beynəlxalq səviyyədə yüksək nəticələrlə başa vurmuşam. Dünya üzrə qəbul şansı 4%-dən az olan "Türkiye Scholarships” proqramı ilə mühəndislik sahəsində Türkiyə üzrə 1-ci, dünya üzrə isə 79-cu yerdə qərarlaşan İstanbul Teknik Universitetinin "Electronics and Communications Engineering” (100% İngilis dili) ixtisasına qəbul olmuşam.
- Elektrik-elektronika mühəndisi olmaq arzusu sizdə necə formalaşdı?
Uşaq yaşlarımdan atama kömək edərək bu sahəyə marağım formalaşdı. Daha sonra TETG məktəbində təhsil alarkən Bəxtiyar Bayramov adlı müəllimim məndə fizika fənninə maraq yaratdı. Olimpiadalarda iştirak etməyə başladım və bu sahədə biliklərim getdikcə dərinləşdi. Beləcə, gələcək karyeram üçün bu istiqaməti seçdim.
- Atanızın bu sahədə olması sizin qərarınıza necə təsir etdi?
Çox müsbət təsir etdi. Kiçik yaşlarımdan elektrik və elektronikaya aid cihazların və proseslərin içində olmuşam. Bu da qərarımı daha da möhkəmləndirdi.
-Məktəbdə təhsilinizi qızıl nişanla başa vurmusunuz. Bu uğuru necə qazandınız?
Bu yol dostluqla, komandalarla və davamlı çalışmaqla başladı. 9-cu sinifdə Technest təqaüd proqramı çərçivəsində "Məktəbli elektronikası” təlimində qazandığım dostluqlar sonradan yarışlara qatılmağımıza səbəb oldu. SAF 2023-də "Boat-Racing” kateqoriyasında birinci yer və "Jury Award" qazandıq. Daha sonra TEKNOFEST 2024-də "İnsansız Sualtı Sistemləri” üzrə finala çıxan və qalib gələn yeganə Azərbaycan komandası olduq. Ardınca "Sabahın Alimləri XIV” müsabiqəsində də birincilik qazandıq. Beləcə, 10-cu sinifdən bəri qatıldığım hər yarışmanı qızıl medalla tamamladım və məktəbi qızıl nişanla başa vurdum.
- "Türkiye Scholarships” proqramına necə hazırlaşdınız?
Bu proqrama SAT imtahanı vasitəsilə müraciət etdim. Güclü akademik nəticələrim və sosial fəaliyyətlərim qəbul prosesi üçün üstünlük yaratdı. Buraxılış imtahanından yüksək nəticə göstərdim. Bundan sonra isə riyaziyyat fənnindən imtahan və müsahibə mərhələsini uğurla keçdim.
- Bu proqram üzrə seçilmək çətin idi? Hansı mərhələlərdən keçdiniz?
Bəli, çətin idi. Proqram üzrə qəbul şansı dünya miqyasında 4%-dən azdır. Əvvəlcə SAT və digər akademik nəticələrim əsasında seçim oldum. Sonra riyaziyyat imtahanı və daha sonra müsahibə mərhələsindən keçdim. Bu prosesdə 9 gün boyunca hər gün 10-11 saat riyaziyyat hazırlaşdım. Nəticədə ilk istədiyim universitetə qəbul aldım.
- Seçdiyiniz ixtisas – Electronics and Communications Engineering – haqqında nə deyə bilərsiniz?
Gələcəyin texnologiyası robototexnika üzərində qurulacaq. Elektronika isə bu sahənin əsas təməl sahələrindən biridir. Həmçinin, elektronika bu gün həyatımızın hər bir sahəsində əvəzolunmaz rol oynayır.
- Məktəbiniz bu uğurda sizə necə dəstək oldu?
Məktəb rəhbərliyi mənə hər zaman inanıb və dəstək olub. Ən çətin anlarda belə motivasiya veriblər. Onların inamı və dəstəyi bu nəticələrin əldə olunmasında böyük rol oynayıb.
- Gələcəkdə bu sahədə hansı istiqamət üzrə ixtisaslaşmaq istəyirsiniz?
Hal-hazırda robototexnika və avtomatlaşdırma sahəsinə marağım böyükdür. Amma bu sahədə son qərarı universitetdəki təhsilim dövründə verməyi düşünürəm. Zamanla daha dəqiq istiqamət müəyyənləşdirəcəyəm.
- Azərbaycanda və ya beynəlxalq arenada hansı problemlərin həllinə töhfə vermək niyyətindəsiniz?
Hazırda Azərbaycanda müdafiə sənayesi yeni inkişaf edir. Bu sahədə çalışaraq ölkəmin gücünə töhfə vermək istəyirəm. Çünki bir ölkənin gücü onun müdafiə sistemidir.
- Təhsilinizi başa vurduqdan sonra Azərbaycana qayıtmağı düşünürsünüzmü?
Bəli. Magistr təhsilimi də yüksək reytinqli universitetdə tamamladıqdan sonra Azərbaycana qayıdaraq, qazandığım bilik və təcrübəni ölkəmin inkişafına yönəltmək istəyirəm.
- Elektrik-elektronika sahəsində atdığınız ilk addım nə olacaq?
İlk addımım robototexnikanı inkişaf etdirmək və bu sahəyə olan marağı artırmaq olacaq. Gəncləri bu sahəyə yönəltmək üçün maarifləndirici layihələr həyata keçirmək istəyirəm.
- Gənclərə, xüsusilə də kənd məktəblərində oxuyan şagirdlərə nə tövsiyə edərdiniz?
Böyük xəyallar qursunlar, amma həmin xəyallara çatmaq üçün kiçik məqsədlər qoysunlar. Hər məqsədə çatdıqca xəyallarına bir addım daha yaxınlaşacaqlar. Kənd məktəbində oxumaq zəiflik deyil. Əksinə, bu mühitdə daha yaradıcı fikirlər ortaya çıxa bilər və yüksək nailiyyətlər əldə oluna bilər.
- Sizi bu uğura aparan əsas motivasiya nə oldu?
SAF 2023-də qazandığımız uğur bizə böyük bir ruh verdi və bu, TEKNOFEST-ə qədər uzanan uğur yolunun başlanğıcı oldu. Bu yolda mənə dəstək olan başda İqrar Nəzərov müəllim olmaqla bütün STEAM Azərbaycan ailəsinə təşəkkür edirəm.
- Bizə vaxt ayırdığınız üçün təşəkkür edirik.
Sağolun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
