Sumqayıt şəhəri, Xəzər bağları massivinin Yuxarı küçəsində yaşayan jurnalist Elşən Yəhyayev ərazidə aparılan infrastruktur işləri ilə bağlı Azərbaycan Respublikasının Prezidenti İlham Əliyevə müraciət ünvanlayıb.
Elşən Yəhyayev müraciətində bildirib ki, son aylarda Sumqayıt şəhərində kanalizasiya və yağış suları sisteminin yenilənməsi çərçivəsində aparılan işlər zamanı küçə boyunca yollar asfaltlanıb. Lakin onun və qonşusunun həyətini əhatə edən hasarların kənar hissələri asfaltlanmayıb. Halbuki eyni küçədə digər sakinlərin hasarlarının kənarları tam şəkildə asfaltlanıb.
Jurnalist qeyd edir ki, bu işlər "EL EPCM” MMC adlı podratçı şirkət tərəfindən həyata keçirilib və bu yanaşma ərazidə selektiv və ədalətsiz münasibət təəssüratı yaradıb.
Eyni zamanda, Elşən Yəhyayev şirkət əməkdaşlarının qeyri-peşəkar davranışına da diqqət çəkib. Onun sözlərinə görə, işlər yekunlaşdıqdan sonra podratçı şirkətin əməkdaşları içi qır dolu qabları yola ataraq ərazidən uzaqlaşıblar. Bu isə həm ətraf mühitin çirkləndirilməsi, həm də sakinlərə qarşı hörmətsizlik kimi qiymətləndirilir.
Elşən Yəhyayev Prezidentə ünvanladığı müraciətdə yaranmış vəziyyətin obyektiv şəkildə araşdırılmasını və müvafiq qurumlara göstəriş verilməsini xahiş edib. O, dövlət başçısının rəhbərliyi altında vətəndaşların hüquq və mənafeyinin daim diqqətdə saxlanıldığına inandığını da vurğulayıb.
Xəbərdən istifadə edərkən istinad etmək vacibdir.
