Sumqayıt İstedad Liseyinin VI sinif şagirdi Torğul Zeynallı həm riyaziyyat, həm də ingilis dili üzrə olimpiadalarda qazandığı uğurlarla diqqət çəkir. Gənc yaşına baxmayaraq, artıq beynəlxalq arenada öz sözünü deməyi bacaran Torğulun uğur hekayəsi bir çox yaşıdlarına ilham verir. Xeberle.com-un əməkdaşı onunla həm təhsil həyatı, həm də gələcək planları barədə söhbətləşib.
— Mən Sumqayıt İstedad Liseyinin 6-cı sinfində oxuyuram. Riyaziyyatı və ingilis dilini çox sevirəm. Bu fənlərə xüsusi marağım var və daha çox öyrənməyə çalışıram.
İlk dəfə olimpiadalara marağın necə yarandı?
— Olimpiadalara marağım bacımdan başladı. O, bir neçə beynəlxalq olimpiadada qalib olmuşdu. Onun uğurlarını görəndən sonra mən də düşündüm ki, niyə olmasın? Mən də iştirak edib nəticə qazana bilərəm.
İstedad Liseyində oxumaq sənə hansı üstünlükləri verir?
— Liseydə müəllimlər dərsləri çox maraqlı və anlaşılan şəkildə izah edirlər. Bu da öyrənmə prosesini həm rahat, həm də motivasiyalı edir.
Gündəlik həyatda səni ən çox motivasiya edən nədir?
— Yaxşı nəticələr. Nəticə gördükcə daha çox çalışmağa həvəsim artır və özümü daha yaxşı hiss edirəm.
USA Olimpiadasında qızıl medal qazanmaq üçün hazırlığın necə keçdi?
— Qalib olmaq məqsədilə hazırlaşdım. Müəllimimlə birlikdə ən çətin mövzular üzərində işləyirdik. Bu məşqlər nəticədə mənə böyük kömək etdi.
Hippo ingilis dili olimpiadasına hazırlığın necə oldu? Ən çətin mərhələ hansıdır?
— Hippo olimpiadasında uğur qazanacağıma çox əmin deyildim. Müəllimimlə birlikdə hazırlaşdıq. Mənim üçün ən çətin mərhələ ikinci tur idi, çünki oradakı suallar daha çətin və diqqət tələb edən idi.
Gələcəkdə hansı sahə üzrə ixtisaslaşmaq istəyirsən?
— Pilot olmaq mənə çox maraqlıdır. Gələcəkdə bu sahədə çalışmaq istəyirəm.
Daha hansı beynəlxalq olimpiadalarda iştirak etməyi planlaşdırırsan?
— İngilis dili və riyaziyyat üzrə daha çox yarışlarda iştirak etməyi planlaşdırıram.
Özün üçün yaxın 5 ildə ən böyük məqsədin nədir?
— Beynəlxalq olimpiadalarda daha çox uğur qazanmaq və biliklərimi artırmaq.
Uğurlarında müəllimlərinin və ailənin rolu nədir?
— Ailəm mənə hər zaman dəstək olur. Onların dəstəyi olmasaydı, bu nəticələri əldə etmək çox çətin olardı. Müəllimlərim də hazırlıq prosesində mənə böyük kömək göstərirlər.
Dərslərlə istirahəti necə balanslaşdırırsan?
— Dərslərimi vaxtında edirəm və istirahətə də vaxt ayırıram. Bu balans mənə daha səmərəli oxumağa kömək edir.
Dostların uğurlarına necə reaksiya verirlər?
— Bəzi dostlarım mənə necə hazırlaşdığımı soruşurlar. Bəzən birlikdə hazırlaşmaq da maraqlı olur.
Boş vaxtlarını necə keçirirsən?
— Telefon və ya kompüterdə maraqlı videolara baxıram, oyun oynayıram. Həmçinin futbol və basketbol oynamağı sevirəm.
Səni bir cümlə ilə xarakterizə etsələr, bu necə səslənər?
— Sakit və özünə inanan.
Olimpiadalardan kənar hansı hobbilərin var?
— Basketbol oynamaq və Lego qurmaq mənim ən sevdiyim məşğuliyyətlərdəndir.
Sənin kimi yüksək nəticələr qazanmaq istəyən uşaqlara nə məsləhət verərdin?
— Hər gün məşq etsinlər və özlərinə inansınlar. İnamsız uğur olmaz.
- Bizimlə həmsöhbət olduğun üçün təşəkkür edirik.
Sağ olun.
Elşən YƏHYAYEV,
Xeberle.com
Xəbərdən istifadə edərkən istinad etmək vacibdir.
