Pulsuz dərmanlar Onkoloji Klinikanın aptekində satılır

Respublikanın baş onkoloqu Azad Kərimli Trendə bildirib ki, onkoloji profilli dövlət müəssisələrində onkoloji xəstələrin həm əməliyyatı, həm də müalicəsi pulsuz həyata keçirilməlidir. A.Kərimlinin sözlərinə görə, Milli Onkologiya Mərkəzindəki (MOM) monitorda xəstələrə verilməli olan dərmanların siyahısı göstərilir. Onkoloji xəstə həmin dərmanların alınması üçün pul ödəməli deyil: "Milli Onkologiya Mərkəzində xəstələrə bütün dərmanlar pulsuz verilir. Cərrahiyyə əməliyyatları üçün lazım olan bütün dərmanlar, sistemlər, ən bahalı antibiotiklər, qaraciyər, böyrək çatışmazlığı olan onkoloji xəstələr üçün lazım olan preparatlar bu mərkəzdə xəstələrə ödənişsiz verilir".

Baş onkoloq qeyd edib ki, onkoloji xəstələrin kimyaterapiyası üçün də tələb olunan dərmanlar xəstələrə pulsuz verilməlidir: "Əslində, kimyaterapiya da xəstələr üçün pulsuzdur. Özəl klinikalarda müalicə olunan xəstələrə isə dərmanları almaq məqsədilə resept yazırlar". Baş onkoloq qeyd edib ki, onkoloji xəstələr üçün dərmanlar dövlət tərəfindən xəstələrin tələbatına uyğun ayrılır. Onun sözlərinə görə, Azərbaycana onkoloji xəstələr üçün dərmanları hansısa şirkət gətirmir, birbaşa olaraq istehsal edildiyi zavodlardan alınır. Ancaq bəzən uzaqdan gətirildiyinə görə dərmanların paylanılmasında gecikmələr olur, bu halda da onların əvəzedicisindən istifadə edilir. Baş onkoloq qeyd edib ki, 9 bölgəyə - rayonlarası onkoloji dispanserlərdə qeydiyyatda olan xəstələr üçün də hər ay dərmanlar göndərilir.

"Onkoloji yardım haqqında" Qanunun tətbiq edilməsi barədə" Prezidentin 442 nömrəli Fərmanının 1.5-ci bəndinin icrasını təmin etmək məqsədi ilə Nazirlər Kabinetinin "Onkoloji xəstələrin dərman vasitələri ilə təminatı Qaydası" haqqında 20 dekabr 2006-cı il tarixli 266 saylı qərarına əsasən onkoloji xəstələr NK tərəfindən müəyyən edilmiş siyahı əsasında dərman vasitələri ilə təmin olunurlar. Onkoloji xəstələr dərman vasitələrini, o cümlədən narkotik və qeyri-narkotik ağrıkəsici preparatları almaq üçün onlara qeydiyyatda olduqları ambulator-poliklinika müəssisəsi (onkoloji dispanser və ya ərazi poliklinikasının onkoloji kabinetində fəaliyyət göstərən həkim onkoloq) tərəfindən 2 nüsxədən ibarət resept yazılır. Pulsuz dərman Səhiyyə Nazirliyi tərəfindən təsdiq edilmiş xüsusi formada olan resept nüsxəsində yazılır. Onkoloji xəstələr üçün spesifik dərman preparatları ilə təyin olunan müalicə 21 günlük intervalla, 6 kursdan az olmamaq şərti ilə aparılır. Onkoloji xəstələr tibbi göstərişlər əsasında yazılmış həkim resepti ilə zəruri miqdarda narkotik və qeyri-narkotik ağrıkəsici preparatlar ala bilərlər. Onların dərman vasitələri ilə təminatı xüsusi resept əsasında ambulator-poliklinika müəssisəsinin (onkoloji dispanser və ya ərazi poliklinikası) müqavilə bağladığı aptek vasitəsi ilə həyata keçirilir. Onkoloji xəstələrin resept əsasında pulsuz aldıqları dərman vasitələrinin dəyəri vətəndaşın yaşadığı ərazi üzrə müvafiq səhiyyə orqanının büdcə vəsaiti hesabına ödənilir.

www.sehiyye.gov.az saytında nazirliyin tərkibində olan Milli Onkologiya Mərkəzinin www.nco.az, www.oncology.az, www.onkologiya.az internet saytlarında onkoloji xəstələrə dövlət hesabına verilən dərman preparatlarının siyahısının yerləşdirildiyi qeyd olunur. Web-saytları yoxladım, sadəcə birincisi açılır. Saytdan bir o məlumatı əldə edə bildim ki, mərkəzin rəhbərliyi bütün günü konfranslarda, xarici ölkələrdədir. Nə dərman siyahısı var, nə ölkədə onlokolji xəstələrin sayı. Bəlkə də saytın harasındasa var, amma mən bir sayt istifadəçisi kimi onu dərhal görə bilmirəmsə ya bu saytı quranların problemidir, ya da mərkəzin işində problem var. Vacib məlumatlar bilərəkdən əlçatan yerə qoyulmur. Burada sadəcə elmi işlər, konfranslar əksini tapıb. Mən bilmədim bu səhifə elm aləmi üçündür, mərkəzin bir işə yaradığını göstərməkdən ötrü özünə lazımdır, yoxsa yerli əhalinin informasiya əldə etməsi üçün nəzərdə tutulub. Bədxassəli şişlərin epidemiologiyası və statistikası şöbəsinin hansı işlə məşğul olduğu saatlarla növbədə dayanan ağır əməliyyat keçirmiş Sona xalanın nəyinə lazımdır? Ya da MOM-da aparılan elmi işlərin adları, elmi şuranın üzvləri, dissertasiya şurasının fəaliyyət hesabatları 3 dəfə borca-xərcə düşüb yoldaşını Ağsudan müalicəyə gətirən və dərmanların pulunu cibindən ödəyən Baba dayının nə marağındadır? Mən bu saytdan bir məlumat ala bilmirəmsə, onlar necə alsınlar? Doğrusu, saytın nəyə yaradığını anlamadım. Saytda "Onkoloji yardım haqqında" Qanunun adı var, özü yox. Qanunun tətbiq edilməsi barədə Prezident fərmanının axtarışında da belə səhifə tapılmadığı yazılır. Orada söhbəti gedən siyahıya da rast gəlmədim. Saytda "onkoloji xəstələrə dövlət hesabına verilən şiş əleyhinə həyati vacib və digər dərman preparatlarının siyahısı" məzmunlu axtarış verdim. Belə cavab gəldi ki, mənim soruşduğum kriteriyalara uyğun məlumat tapılmadı, başqa açar sözlə axtarmalıymışam. "Dərman", "dərman preparatı" yazdım, yenə həmin siyahı gəlmədi. Sözügedən siyahını təqdim edirik:

5-Ftoruracil

BIOPSIYA IYNƏSİsümük iliyi uçün

KLAFORAN

POVIDON IOD

Bleomycin

BISAKODIL

KLEKSAN

PREDNIZOLON

Bondronat

BROMGEKSIN

KLEKSAN

PREDUKTAL MR