Hər bir sənətin arxasında bir sevgi, bir hekayə dayanır. Xüsusilə şirniyyat hazırlamaq – sadəcə bir iş deyil, bu həm zövq, həm incəlik, həm də sevinc bəxş edən bir sənətdir. Bugünkü müsahibimizin həyatı da məhz bu şirin sənətin ətrafında formalaşıb. O, uşaq yaşlarından anasının mətbəxində qazandığı təcrübəni illər sonra peşəyə çevirərək Sumqayıtda yüzlərlə insanın zövqünə xitab edən ləzzətlər yaradıb.
1982-ci ildə Sumqayıtda dünyaya gələn Reyhan Zeynalova bu gün tort və şirniyyat sahəsində tanınan, sevilən bir isimdir. Onun hazırladığı tortlar yalnız dadı ilə deyil, görünüşü və təqdimatı ilə də seçilir. Bu müsahibədə biz onun şirniyyatla olan hekayəsini, peşəyə olan bağlılığını, qarşılaşdığı maraqlı hadisələri və gələcəyə dair arzularını daha yaxından öyrənəcəyik.
- Şirniyyat sevgisi sizdə nə vaxtdan yaranıb? İlk dəfə nə bişirmişdiniz?
Şirniyyat sevgim hələ çox kiçik yaşlarımdan yaranıb. Anamın bişirdiyi təamları seyr edərək, ona kömək edərək bu sevgini içimdə böyütdüm. İlk bişirdiyim şirniyyat isə cemli piroq olub. Ola bilsin elə buna görə də ən sevdiyim şirniyyat məhz odur. Bu piroq mənim üçün həm nostalji, həm də ilham qaynağıdır.
- Sizi bu sənətə ilhamlandıran əsas insan kim olub?
Bu sənətə olan marağımın əsas səbəbkarı – mənim əziz anamdır. Anam heç zaman mənə mane olmadı, əksinə, həmişə dəstək verdi. Onun şirniyyatlara olan həvəsi və hazırladığı ləzzətlər məni bu sahəyə yönəltdi. Gözümü açandan anamın və nənəmin ləzzətli bişintiləri ilə böyümüşəm. Fürsətdən istifadə edib anamı buradan da böyük sevgi və minnətdarlıqla qeyd etmək istəyirəm. Yaxşı ki var!
- Hazırladığınız tort və şirniyyatlarda daha çox hansı ləzzətlərə üstünlük verirsiniz?
İstifadə etdiyim məhsulların təzə və keyfiyyətli olmasına xüsusi diqqət yetirirəm. Ləzzət baxımından isə balanslı və ev dadı verən şirniyyatlara üstünlük verirəm. Klassik ləzzətləri müasir toxunuşlarla təqdim etməyə çalışıram. Vanilli, şokoladlı, meyvəli və qozlu tərkiblər müştərilər tərəfindən də çox sevilir.
- Müştərilərinizin ən çox sifariş verdiyi şirniyyat və ya tort hansıdır?
Müştərilərimizin sevdiyi şirniyyatlar arasında qozlu şirniyyatlarımız, şəkərparə və paxlava xüsusi yer tutur. Tortlar arasında isə Abşeron tortu və sadə biskvit tortu ən çox sifariş olunanlardandır.
- Sifarişlərinizi qəbul edərkən nələrə diqqət edirsiniz?
Sifariş qəbul edərkən bir neçə vacib məqamı nəzərə alıram:
• Sifarişin hazırlanma və təhvil vaxtı
• Tort üzərində yazılacaq yazı
• İstənilən tərkib və dizayn detalları
Ən əsas məsələ müştərinin arzusunu tam anlamaq və onu yüksək keyfiyyətlə həyata keçirməkdir.
- İşinizdə sizi ən çox sevindirən və motivasiya edən nədir?
Ən böyük motivasiyam müştərilərdən aldığım xoş sözlər və təriflərdir. Hər bir "Çox gözəl olmuşdu” mesajı məni daha da həvəsləndirir və işimə olan sevgimi artırır.
- Uğurlu bir tort ustası olmaq üçün hansı xüsusiyyətlər vacibdir?
Ən vacib xüsusiyyət – səbrdir. Tort və şirniyyat hazırlamaq zərif və detallı bir işdir. Əgər səbriniz yoxdursa, nəticə ürəkaçan olmayacaq. Səbrlə və sevgi ilə edilən hər iş gözəl alınır.
- Ən yadda qalan sifarişiniz hansıdır və niyə?
Bir dəfə bir valideyn 5 yaşlı oğlu üçün öz zövqünə uyğun tort sifariş etmişdi. Uşaq tortu görəndə göz yaşları ilə anasına dedi ki, "Mən bu personajları sevmirəm, qorxuram!” Anındaca vəziyyəti həll etdik – uşağın sevdiyi personajlarla yeni tort hazırladıq. Onun sevinci hər şeyə dəyərdi!
- Yeni reseptlər və ya dizaynlar üçün ilhamı haradan alırsınız?
Bu gün internet böyük fürsətlər yaradır. Mən də əsasən sosial şəbəkələr, YouTube və Instagram-dan ilham alıram. Bəzən bir şəkil, bir video tamamilə yeni bir ideyanın yaranmasına səbəb olur.
- Sizcə, Sumqayıtda şirniyyat sahəsində fəaliyyət göstərən xanımlar üçün hansı imkanlar və çətinliklər var?
Sumqayıtda bu sahəyə maraq getdikcə artır. Xüsusilə sosial şəbəkələr sayəsində tanıtım imkanları çoxdur. Amma təbii ki, rəqabət də var. Ən əsas çətinliklərdən biri isə keyfiyyətli məhsullara çıxışın bəzən məhdud olmasıdır. Lakin əzm və doğru yanaşma ilə bu çətinlikləri də aşmaq mümkündür.
- Gələcəkdə bu sahə ilə bağlı hansı planlarınız və arzularınız var?
Ən böyük arzularımdan biri işimi daha da böyütmək, geniş mətbəxə və daha böyük komanda ilə işləməkdir. Eyni zamanda, gələcəkdə öz şirniyyat brendimi yaratmaq və kurslar keçmək istərdim.
- İşinizi sosial şəbəkələrdə tanıtmaq üçün hansı üsullardan istifadə edirsiniz?
Əsasən Instagram və WhatsApp üzərindən aktiv paylaşımlar edirik. Müştərilərin razı qaldığı sifarişləri paylaşmaq, hazırlanma proseslərindən "story”lər vermək maraq doğurur və daha çox insana çatmağa kömək edir.
- Ev, ailə və iş arasında balansı necə qoruyursunuz?
Bu balansı qorumaq çətindir, amma mümkündür. Ailəmin dəstəyi çox böyük rol oynayır. Eyni zamanda, işimi planlı şəkildə həyata keçirməyə çalışıram ki, həm ailəyə, həm də işə vaxt ayrılsın.
- Tort hazırlamaq istəyən gənc xanımlara nə tövsiyə edərdiniz?
Əgər bu sahəyə sevginiz və marağınız varsa – mütləq çalışın, öyrənin və dayanmadan təcrübə qazanın. Hər bir müvəffəqiyyətin arxasında zəhmət dayanır. Ən gözəl hiss isə uşaqların gözündəki sevinc və razılıq mesajlarıdır.
- Sizin üçün "mükəmməl tort” nə deməkdir?
Mənim üçün mükəmməl tort – dadlı tortdur. Zövqlü bəzək, gözəl görünüş vacibdir, amma dad ən önəmli amildir. Müştəri bir parça yeyəndə məmnun qalırsa, bu artıq uğurdur.
- Bizə vaxt ayırdığınız üçün təşəkkür edirik.
Sağ olun.
Xəbərdən istifadə edərkən istinad etmək vacibdir.
