Mayın 16-da Sumqayıt "ASAN xidmət” mərkəzinin təşkilatçılığı ilə Rəşid Behbudov adına Dövlət Mahnı Teatrında görkəmli yazıçı, alim və pedaqoq Mir Cəlal Paşayevin xatirəsinə həsr olunmuş tədbir keçirilib.

AZƏRTAC xəbər verir ki, tədbirdə Mir Cəlal Paşayevin həyat və fəaliyyətindən bəhs edən videoçarx nümayiş olunub, habelə ədəbiyyatşünas alimin yaradıcılığı haqqında geniş məlumat verilib.

Sonra görkəmli yazıçının "İclas qurusu” hekayəsi və "Bir gəncin manifesti” romanından "Sonanın cavabı” əsasında hazırlanmış tamaşa təqdim olunub. Tamaşada görkəmli yazıçının tələbələri ilə söhbəti və tələbələrinin onun haqqında xatirələri də canlandırılıb.

Tamaşada Sumqayıt "ASAN xidmət” mərkəzinin əməkdaşları və könüllüləri iştirak ediblər.

Sonda könüllülər tərəfindən "Torpağın səsi” mahnısı ifa edilib.

Qeyd edək ki, "ASAN xidmət” mərkəzinin könüllüləri Azərbaycanın dahi şəxsiyyətlərinin həyat və fəaliyyətinin öyrənilməsi və gənclər arasında təbliği istiqamətlərində müxtəlif təqdimatlar hazırlayır.