Sumqayıt şəhəri, Nəsimi adına Mədəniyyət və İstirahət parkından, Göyərçin abidəsinin ətrafındakı yaşıllıq zolağında ağacların kəsilməsi ilə bağlı sosial şəbəkələrdə görüntülər yayılıb. Kadrlarda günorta saatlarında abidənin ətrafındakı ağaclıq sahədə kəsim işlərinin aparıldığı əks olunur. Bu görüntülər sakinlər tərəfindən birmənalı qarşılanmayıb.
Məsələ ilə əlaqədar Sumqayıt Şəhər İcra Hakimiyyətindən bildirilib ki, sözügedən parkda həyata keçirilən yaşıllaşdırma və abadlıq tədbirləri çərçivəsində Yaşıllaşdırma İdarəsi tərəfindən quru və güclü külək nəticəsində qəzalı vəziyyətə düşmüş, təhlükə yaradan ağacların kəsilməsi aparılıb.
Qurumdan qeyd olunub ki, işlər Ekologiya və Təbii Sərvətlər Nazirliyinin mütəxəssislərinin iştirakı ilə keçirilən baxış və verilmiş müvafiq rəy əsasında icra edilib. Məlumata görə, məqsəd park ərazisində ekoloji tarazlığın qorunması, vətəndaşların təhlükəsizliyinin təmin olunması və yaşıllıq sahələrinin sağlamlaşdırılmasıdır.
Eyni zamanda bildirilib ki, kəsilən ağacların əvəzinin bərpası üçün sözügedən ərazidə 300-ə yaxın yeni ağac əkilib.
Qeyd edək ki, Yaşıllıqların Mühafizəsi Haqqında Azərbaycan Respublikasının Qanununa əsasən, yeni tinglər icazə əsasında götürülmüş, yaxud təbii şəkildə məhv olmuş yaşıllıqların yerində əkilməlidir.
Əməkdaşımızın əraziyə baxışı zamanı həmin sahədə yeni əkilmiş tinglər müşahidə edilməyib.
Xəbərdən istifadə edərkən istinad etmək vacibdir.
