Sumqayıt şəhərində ictimai nəqliyyatda istifadə üçün yeni avtobuslar və taksilər gətirilib. Nəqliyyat vasitələrinin şəhər İcra Hakimiyyətinin qarşısında şəhər rəhbərliyi və ictimaiyyəti, həmçinin media nümayəndələri üçün təqdimatı keçirilib.
Sumqayıt Şəhər İcra Hakimiyyətinin müavini Sahib Quliyev Xeberle.com-a məlumat verib ki, ilkin olaraq "Karsan Karatas" markalı avtobus və London taksilərinin hərəsindən 15 dənə olmaqla dövriyyəyə buraxılacaq. Avtobuslar 7 saylı marşrut üzrə hərəkət edəcəklər. İlin sonuna qədər daha 60 bu tip avtobus 7 saylı marşrutunun dövriyyəsinə buraxılacaq. Nəzərinizə çatdıraq ki, sözügedən avtobuslar standartlara tam cavab verir. Onlar kondisionerə, qızdırıcıya, eyni zamanda əlilliyi olan insanlar üçün müyəssərliyə - müvafiq panduslara malik avtobuslardır. Bu avtobuslar dayanacağa yaxınlaşanda avtomatik aşağı yatır. 
Taksilərdən isə ilin sonunadək daha 70 ədəd gətirilməsi nəzərdə tutulub.
Sumqayıtda ictimai nəqliyyat sektorunda çalışmaq istəyən sürücülər Sumqayıt Şəhər Nəqliyyat Departamentinin rəisi Anar Səfərliyə müraciət edə bilərlər.
Xeberle.com