Küçələrdən az qala mənzilimizə qədər gəlib çatan zibilləri MİS, yoxsa Təmizlik Departamenti təmizləməlidir?
Nəzərə alsaq ki, yay fəslidir və havaların çox isti olmasına görə məişət tullantıları, qida qalıqları tez xarab olduğu üçün, üstəlik hər binanın qarşısında olan zibil qutuları da vaxtında boşaldılmadığından məhlələrin qarşısından üfunət iyindən keçmək müşkülə çevrilib. Bu azmış kimi hava almaq üçün eyvana çıxmaq istəsən, mütləq əleyhqazdan istifadə etməli olacaqsan, illahda havada bir azca meh ola...
Bir neçə gün öncə sizə Sumqayıt şəhəri 17–ci mikrorayondakı zibillik qutularının dolub daşdığından, ətrafa səpələnən antisantariya mənbəyinin təmizlənmədiyindən xəbər vermişdik. Material portalımızda yer aldıqdan sonra mənzil istismar idarəsindən gəlib yalnız ortalıqda yığılmış zibilləri bir balaca təmizlədilər. Qalan zibillər də, köhnə yarımişlək vəziyyətdə olan qutularda elə ağızbaağız dolu olaraq durur. Qıcqırma prosesini artıq keçərək iylənmiş zibil qalıqları yenə də həyət və küçələrin "bəzəyi”dir. Bunu Sumqayıtın bir neçə mikrorayonunda apardığımız kiçik müşahidələrdən aydınca gördük.
Maraqlıdır mikrorayonlardakı zibillər niyə təmizlənmir? Bildiyim bircə fakt var – hər ay mənzil istismar idarəsindən gəlib sakinlərdən zibil pulu yığılır. Sadəcə bir sual maraqlıdır: "Binaların qarşısındakı zibillərdən məsuliyyətli olan qurum öz işini niyə yerinə yetirməkdən boyun qaçırır?”

Xədicə Səxavətqızı
Xeberle.com