Axır ki, Sumqayıtın "yolçəkən əmiləri"nin yadına şəhərin digər yerləri də düşdü.

Son bir neçə gündür ki, İsmət Qayıbov küçəsinin yolları yenilənir. Qır "ətirli" asfalt örtüyü bir bilsəniz sakinləri nə qədər sevindirir. Yeni yol örtüyü ilə bağlı deyil bu sevinc. Nəhayət ki, yerli aidiyyəti qurumların yadına düşdüyü üçün sevinir insanlar. Sürücülər, piyadalar bəlkə də nəzir-niyaz paylayırlar manatın dollarla güləşdiyi bir dönəmdə. Haqqında bəhs olunan ərazi şəhərin şadlıq sarayları cəngəlliyi tərəfdədir. Daha bəy və gəlinlər toy maşınlarında atılıb düşə-düşə getməyəcək. Yeni yolda yeni bir həyata başlayacaqlar. Bu arada tamada kimi bir sağlıq yerinə düşər: Aidiyyəti qurumlardan arzumuz budur ki, belə yeni yollardan Sumqayıtın Çerkassı küçəsi və onun müqabilində digər ərazilərinə də bəxş etsinlər.

Elvin Babayev
Xeberle.com