Sumqayıt şəhərinin 17-ci mikrorayonundakı 5 nömrəli uşaq bağçasının fidanları artıq qışın soyuğundan qorxmayacaqlar. Çünki Sumqayıt kimyaçıları burada əsaslı təmir, yenidənqurma və abadlıq işləri aparıblar.
AzərTAc xəbər verir ki, uşaqların böyük sevincinə səbəb olan bu işlər qısa vaxtda görülüb. Azərbaycan Respublikası Dövlət Neft Şirkətinin (ARDNŞ) "Azərikimya” İstehsalat Birliyinin kollektivi uşaq bağçasının zirzəmisinə dolmuş suyu təmizləyib, bütün su və kanalizasiya xətlərini dəyişdirib, daxili istilik sistemini və elektrik xətlərini yeniləyib. Şənbə günü kimyaçılar uşaq bağçanın müəllim və tərbiyəçiləri, valideynlərlə birlikdə həyətyanı sahədə iməcilik keçirib, özləri ilə gətirdikləri 100 ağacı əkiblər.
Bundan əlavə, Azərbaycan Qızıl Aypara cəmiyyətinin şəhər təşkilatı ilə birlikdə "Mərhəmətli olmağa tələsin” şüarı altında başlayan isti-geyim aksiyası çərçivəsində toplanan vəsaitdən alınan gödəkcələrdən 20-si bağçanın balaca sakinlərinə hədiyyə edilib.