Bakı-Sumqayıt-Bakı marşrutu ilə ikimərtəbəli elektrik qatarları fəaliyyətini davam etdirir. "Stadler Rail Group" şirkətinin istehsalı olan yüksək komfort şəraitli KİSS markalı ikimərtəbəli elektrik qatarlarından istifadə edən sərnişinlərin sayı getdikcə artmaqdadır.
SalamNews xəbər verir ki, noyabrın 13-də Bakı-Sumqayıt-Bakı elektrik qatarının xidmətlərindən istifadə edən 100000-ci (yüz mininci) sərnişin bəlli olub. Biletin sahibi Memarlıq və İnşat İnstitutunun I kurs tələbəsi, Sumqayıt şəhər sakini Tacan Kərimli olub.
100000-ci sərnişinə Sərnişin daşımaları Departamenti tərəfindən biznes-klass vaqonunda 1 (bir) ay ərzində pulsuz istifadə sertifikatı verilib.
"Azərbaycan Dəmir Yolları” Qapalı Səhmdar Cəmiyyətinin Mətbuat Katibliyinin rəisi Nadir Əzməmmədov bildirib ki, gələcəkdə də sərnişinlərin tam komfortlu və təhlükəsiz mənzil başına çatdırılması istiqamətində görülən işlər davam etdiriləcək.