Sumqayıt şəhərində, xüsusilə 4 Qardaş şadlıq sarayı ərazisində yol hərəkətinin təşkili ilə bağlı sakinlər narazılıq edirlər. Problemin Cəlil Məmmədquluzadə küçəsi ilə bulvar istiqamətindən yuxarı qalxaraq Səməd Vurğun küçəsinə – Novxanı-Bakı yoluna dönüş hissəsində yaşandığı bildirilir.
Axşam saatlarında ciddi tıxac yaranır
Sakinlərin Xeberle.com-a bildirdiyinə görə, sözügedən ərazidə yol nişanı elə yerləşdirilib ki, xüsusilə axşam saatlarında avtomobillərin sırası bulvar istiqamətinə qədər uzanır.
Sola – Novxanı istiqamətindən gələn əsas yola çıxmaq istəyən sürücülər uzun müddət gözləməli olurlar. Sol zolaqda nəqliyyatın intensiv hərəkəti səbəbindən dönmək çətinləşir və nəticədə dəqiqələrlə davam edən sıxlıq yaranır.
Qarşı istiqamətdə də hərəkət çətinləşir
Bundan əlavə, qarşı istiqamətdən düz aşağı enmək istəyən avtomobillər də eyni nöqtədə tıxacla üzləşir. Sürücülər əvvəlcə əsas yoldakı nəqliyyatın azalmasını gözləyir, daha sonra isə qarşı tərəfdən gələn avtomobillərə yol verməli olurlar. Bu isə vəziyyəti daha da mürəkkəbləşdirir və hərəkəti faktiki olaraq iflic edir.
Artan əhali və tikinti sıxlığı vəziyyəti ağırlaşdırıb
Sakinlər bildirirlər ki, ərazidə qoyulmuş yol nişanı əvvəlki dövrdə nəqliyyatın həcminə uyğun olub və müəyyən müddət ərzində normal işləyib. Lakin son illər bulvar ətrafında yeni yaşayış binalarının tikilməsi nəticəsində əhalinin sayı xeyli artıb.
Eyni zamanda, həmin ərazidə aparılan tikinti işlərində çalışanların və tikinti texnikasının da çoxalması nəqliyyat axınına əlavə yük yaradıb. Bu səbəbdən mövcud yol hərəkəti sxemi artıq real vəziyyətə uyğun gəlmir və tıxac qaçılmaz olur.
Sakinlər alternativ həll təklif edir
Şəhər sakini problemin həlli üçün bir neçə təklif irəli sürüb. Onun sözlərinə görə, ərazidə ya dairəvi hərəkət (kruq) təşkil edilməli, ya da növbəli keçidi təmin edən işıqfor quraşdırılmalıdır.
Təklif olunur ki, sola dönüş üçün ayrıca işıqfor mərhələsi müəyyən edilsin. Belə olduqda sürücülər yalnız müvafiq işıq yandıqda dönə biləcək və hərəkət daha nizamlı şəkildə təşkil olunacaq.
Sakinlər aidiyyəti qurumları məsələni araşdırmağa və ərazidə yol hərəkətinin təhlükəsiz və rahat təşkili üçün zəruri tədbirlər görməyə çağırırlar.
Xəbərdən istifadə edərkən istinad etmək vacibdir.
