"Azərikimya" İstehsalat Birliyinin rəhbər heyəti ilə Etilen-polietilen zavodunda bir aylıq istehsalat təcrübəsi keçəcək tələbələrin görüşü olub.

Tədbiri giriş sözü ilə açan İB-nin icraçı direktorunun kadr, rejim və informasiya texnologiyaları üzrə müavini Xalıq Mustafayev bildirib ki, iki ay əvvəl SOCAR-ın İnsan Resursları Departamentinin pilot layihəsi çərçivəsində Qafqaz və Sumqayıt Dövlət Universitetlərində, Azərbaycan Dövlət Neft Akademiyasında tələbələrlə görüşlər keçirilib, müsahibə yolu ilə onların nəzəri bilikləri yoxlanılıb.
Müsahibədə bakalavr və magistr pillələri üzrə təhsil alan 200-dən çox tələbə iştirak edib və onlardan 26 nəfər növbəti mərhələyə vəsiqə qazanıb.
Seçilən 26 tələbə mayın 12-dən etibarən 4 istiqamət - energetika, texnologiya, mexanika və metrologiya istiqamətləri üzrə Etilen-polietilen zavodunda təcrübəli mütəxəssislərin rəhbərliyi altında bir aylıq istehsalat təcrübəsi keçəcək, sonra test imtahanı verəcəkdir.
Test imtahanında yüksək nəticə qazanan 10 nəfərlə əmək müqaviləsi bağlanılacaq və onlar "Azərikimya" İB-nin istehsalatlarında daimi işlə təmin olunacaqlar.
Hərbi xidmətdə olmayan gənclər isə ARDNŞ-nin İnsan Resursları Departamentinin ehtiyat kadr bazasında qeydiyyata alınacaq, xidmətlərini başa vurduqdan sonra onların işə qəbulu məsələsinə baxılacaqdır.
Sonda gənc kadrların sualları cavablandırılıb.
Xeberle.com