2025-ci ilin 12 noyabr tarixində Mingəçevir Şəhər İcra Hakimiyyəti və Mingəçevir Dövlət Universitetinin (MDU) birgə təşkilatçılığı ilə "Konstitusiya və Suverenlik İli” çərçivəsində Konstitusiya Gününə həsr olunmuş "Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda elmi-praktik konfrans keçirilib.
Əvvəlcə iştirakçılar Ulu Öndər Heydər Əliyevin büstü önünə gül dəstələri düzüb, onun əziz xatirəsini dərin hörmət və ehtiramla anıblar.
Universitetin akt zalında keçirilən konfrans Azərbaycan Respublikasının Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb. Ardınca "Azərbaycanın ilk Konstitusiyası” adlı videçarx nümayiş etdirilib.
Konfransı Mingəçevir Şəhər İcra Hakimiyyətinin başçısı İlham İsmayılov açaraq çıxışında 1995-ci ildə ümumxalq səsverməsi ilə qəbul edilən ilk milli Konstitusiyanın Azərbaycanın müstəqil dövlət kimi siyasi və hüquqi əsaslarının möhkəmlənməsində tarixi rolundan danışıb. O, qeyd edib ki, Ulu Öndər Heydər Əliyevin rəhbərliyi ilə formalaşan dövlət idarəetmə sistemi, hüquqi dövlət və vətəndaş cəmiyyəti prinsipləri bu gün Prezident İlham Əliyevin rəhbərliyi altında daha da inkişaf etdirilir və müasir dövrün tələblərinə uyğun şəkildə təkmilləşdirilir.
İcra başçısı həmçinin "Konstitusiya və Suverenlik İli”nin elan edilməsinin müstəqilliyimizin 30 ildən artıq inkişaf yoluna və 2020-ci ildə Vətən müharibəsində əldə edilən tarixi Zəfərin beşillik yubileyinə dərin mənəvi məna verdiyini vurğulayıb və tədbir iştirakçılarını Konstitusiya Günü münasibətilə təbrik edib.
Daha sonra, konfransın proqramına uyğun olaraq məruzələr dinlənilib.
MDU-nun rektoru Anar Eminov "Ulu Öndər Heydər Əliyev Müstəqil Azərbaycan Respublikasının Konstitusiyasının yaradıcısıdır” mövzusunda çıxış edərək bildirib ki, 1995-ci il Konstitusiyası Azərbaycanın dövlət müstəqilliyinin ideya, hüquqi və siyasi təminat sənədidir. Rektor vurğulayıb ki, bu sənədin hər bir maddəsində Heydər Əliyev dövlətçilik fəlsəfəsinin dərin izləri görünür: insan və vətəndaş hüquq və azadlıqlarının qorunması, qanunun aliliyi, hakimiyyət bölgüsü və demokratiyanın əsas prinsipləri bu Konstitusiyanın ruhunu təşkil edir.
Anar Eminov həmçinin qeyd edib ki, bugünkü müasir Azərbaycanın bütün nailiyyətləri məhz həmin hüquqi-siyasi təməl üzərində formalaşıb və universitet gənclərinin də dövlətçiliyimizin bu dəyərləri əsasında yetişməsi MDU-nun təhsil siyasətinin əsas istiqamətlərindəndir.
Milli Məclisin deputatı Əli Hüseynli "Müstəqil Azərbaycan Respublikası Konstitusiyasının müasir dövlətçiliyimizin təşəkkülündə rolu” mövzusunda məruzəsində bildirib ki, Konstitusiya ölkəmizin hüquqi sisteminin əsasını təşkil etməklə yanaşı, cəmiyyətin demokratik inkişaf modelini müəyyənləşdirib. Deputat qeyd edib ki, bu sənədin qəbulundan sonra Azərbaycanın qanunvericilik bazası tamamilə yenilənmiş, vətəndaş cəmiyyəti institutları möhkəmlənmiş, dövlət orqanlarının fəaliyyəti şəffaflıq və hesabatlılıq prinsiplərinə əsaslanmışdır.
Əli Hüseynli vurğulayıb ki, son illərdə Konstitusiyaya edilən dəyişikliklər də zamanın tələblərinə cavab verərək dövlət idarəçiliyinin effektivliyinin artırılmasına və insan hüquqlarının müdafiəsinin gücləndirilməsinə xidmət edir.
Mingəçevir şəhər prokuroru, baş ədliyyə müşaviri Pərvin Quliyev "Ulu Öndərin müəllifi olduğu Azərbaycan Respublikasının Konstitusiyası vətəndaşların hüquq və azadlıqlarının təminatçısıdır” mövzusunda çıxışında bildirib ki, Konstitusiya yalnız dövlətin idarə prinsiplərini müəyyənləşdirmir, eyni zamanda vətəndaşların hüquqlarının qorunmasının ən ali təminat sənədidir.
O, qeyd edib ki, bu sənədlə vətəndaşların söz, vicdan, toplaşmaq, mülkiyyət və seçki hüquqları dövlət səviyyəsində qorunur və bu prinsiplərin həyata keçirilməsi prokurorluq orqanlarının da fəaliyyətində əsas istiqamətlərdəndir. Pərvin Quliyev həmçinin vurğulayıb ki, hüquqi maarifləndirmə və qanunçuluğun möhkəmləndirilməsi istiqamətində həyata keçirilən tədbirlər məhz Konstitusiyanın ruhuna uyğun olaraq aparılır.
Universitetin Təhsil fakültəsinin dekan müavini Aygün Qədirova isə "Konstitusiya quruluşunun bütün ölkə ərazisində bərqərar olunması Ulu Öndər Heydər Əliyev ideyalarının reallaşmasının nəticəsidir” mövzusunda məruzəsində bildirib ki, Konstitusiyanın qəbulundan sonra ölkədə hüquqi dövlətin qurulması, təhsil və sosial sahələrdə islahatların aparılması, vətəndaş cəmiyyəti institutlarının formalaşması Ulu Öndərin dövlətçilik ideyalarının uğurlu nəticəsidir.
O, çıxışında xüsusilə gənc nəslin hüquqi biliklərinin artırılmasının və konstitusiya dəyərlərinə hörmətin formalaşdırılmasının vacibliyini qeyd edib, bu istiqamətdə MDU-da həyata keçirilən maarifləndirici tədbirləri diqqətə çatdırıb.
Qeyd edək ki, MDU-nun silsilə tədbirlərinə uyğun olaraq "Konstitusiya və Suverenlik İli” çərçivəsində müxtəlif tədbirlər davam etdirilir.
Xəbərdən istifadə edərkən istinad etmək vacibdir.
